काठमाडौं - आफ्नै शरीरमा आगो लगाएर गम्भीर घाइते भएका गणेश नेपालीको स्वास्थ्य अवस्था अझै पनि चिन्ताजनक र अस्थिर रहेको वीर अस्पतालले जनाएको छ। उपचारमा संलग्न चिकित्सकका अनुसार उनलाई भेन्टिलेटरमा राखिएको छ र कुनै पनि बेला स्वास्थ्य अवस्था थप जटिल बन्न सक्ने जोखिम रहेको छ।
चिकित्सक डा. रविलाम श्रेष्ठको नेतृत्वमा रहेको चिकित्सक टोलीले नेपालीको उपचार गरिरहेको छ। चिकित्सकका अनुसार उनलाई दिउँसो २:२० बजे अस्पताल ल्याइएलगत्तै कुलिङ उपचार सुरु गरिएको थियो। त्यसपछि श्वासप्रश्वास सहज बनाउन इन्टुबेसन गरिएको र पहिलो चरणको शल्यक्रिया सम्पन्न भए पनि स्वास्थ्य अवस्थामा उल्लेखनीय सुधार आउन नसकेको जनाइएको छ।
वीर अस्पतालको विशेष टोलीले उनको उपचार गरिरहेका छन् । अस्पतालका प्लास्टिक सर्जरी विभागका संयोजक डा. पियुष दाहालको नेतृत्वमा युनिट प्रमुख डा. अपार लामिछाने, क्रिटिकल केयरका डा. निर्मण ज्ञवाली, एनेस्थेटिस्ट जयप्रकाश ठाकुर, प्रा. डा. रविराम श्रेष्ठ र नर्सिङ सेवाका स्वास्थ्यकर्मीसहित २१ जनाको विशेष टोलीले उनको उपचार गरिरहेका छन् ।
चिकित्सकले भने, “पहिलो चरणको शल्यक्रिया सम्पन्न गर्दा राति ८ बजेको थियो। हामी रातभर उपचारमै खटिएका छौँ। यद्यपि, अहिले नै अवस्था सुधार हुने वा नहुनेबारे केही भन्न सकिने स्थिति छैन। सम्पूर्ण चिकित्सक टोली बिरामीको ज्यान बचाउन निरन्तर प्रयासरत छ।”
उनका अनुसार नेपालीको अनुहार, टाउको, घाँटी र छातीमा गम्भीर जलन भएको छ भने शरीरका भित्री अंगहरूमा समेत असर परिसकेको छ। यति धेरै प्रतिशत शरीर जलेका बिरामीलाई बचाउन अत्यन्त कठिन हुने चिकित्सकको भनाइ छ।
नेपालीकाे शरीर ६५ प्रतिशत जलन आंकलन गरेपनि जाँचपछि ५५प्रतिशत मात्र रहेकाे उनले बताए । “धेरै ठूलो जलन भएपछि शरीरका अन्य अंगहरूमा पनि असर पर्छ। बिरामीको ब्लड सुगर ३०० भन्दा माथि पुगेको छ। त्यसका बाबजुद पनि हामी उपचारमा कुनै कसर बाँकी राखेका छैनौँ,” चिकित्सकले बताए।
यसैबीच, थप उपचारका लागि भारत लैजाने तयारी गरिए पनि बिरामीको अत्यन्त नाजुक अवस्थाका कारण अहिले नै स्थानान्तरण गर्नु जोखिमपूर्ण हुने चिकित्सकहरूले बताएका छन्। “भारतमा पनि उपचार टोली तयारी अवस्थामा थियो। तर, अहिले बिरामीलाई अस्पतालबाट बाहिर लैजाँदा थप जोखिम हुने देखिएकाले तत्काल स्थानान्तरण गरिएको छैन,” चिकित्सकले जानकारी दिए।
