काठमाडौं - सावित्रा भण्डारी ‘साम्बा’को उपचार प्रकरणले राष्ट्रिय महिला लिगमै विवाद चर्किएको छ। कप्तान भण्डारीलाई उपचारमा बेवास्ता गरिएको भन्दै विरोधस्वरूप कालोपट्टि बाँधेर मैदान छिर्न खोजेका खेलाडीलाई रोक लगाइएपछि खेलभन्दा बाहिरको विषयले बढी चर्चा पाएको हो।
सातदोबाटोस्थित एन्फा कम्प्लेक्स मा जारी लिगअन्तर्गत फ्रेन्ड्स क्लब का खेलाडी कालोपट्टि बाँधेर मैदान प्रवेश गर्न तयारी अवस्थामा थिए। तर अखिल नेपाल फुटबल संघ (एन्फा)का अफिसियलले खेल सामग्रीसम्बन्धी नियम उल्लंघन हुने भन्दै त्यसो गर्न नदिएको जनाइएको छ।
फ्रेन्ड्स क्लबका एक पदाधिकारीका अनुसार ‘साम्बा’प्रति ऐक्यबद्धता जनाउन प्रतीकात्मक रूपमा कालोपट्टि बाँध्न खोज्दा एन्फाले नियमविपरीत भएको तर्क गर्दै रोकेको हो। यस घटनापछि महिला फुटबल वृत्तमा खेलाडी अधिकार, स्वास्थ्य सुरक्षाका मापदण्ड र संघको भूमिकाबारे नयाँ बहस सुरु भएको छ।
