हेटौंडा - नेपाल प्रिमियर लिग (एनपिएल) को साविक विजेता जनकपुर बोल्ट्स र हेटौंडा स्कुल अफ म्यानेजमेन्ट एण्ड सोसिएल साइन्सेसबीच यो वर्ष पनि सहकार्य हुने भएको छ । जनकपुर र म्यानेजमेन्टको प्रतिनिधिले शुक्रबार हेटौंडामा सम्झौता पत्रमा हस्ताक्षर गर्दै यसवर्ष पनि सहकार्यलाई जारी राख्ने घोषणा गरेका हुन् ।
जनकपुरको तर्फबाट क्लबका सहलगानीकर्ता महेश सिग्देल र म्यानेजमेन्टका प्रिन्सिपल पुरण बहादुर जाेशीले सम्झौतामा हस्ताक्षर गरेका हुन् । क्रिकेट खेलको विकास र शिक्षामा सहकार्य गर्दै अगाडि बढ्ने प्रतिबद्धता दुवैले जनाएका हुन् ।
सम्झौता अनुसार स्कुलले करिब २५ लाख रुपैयाँ बराबरको सहयोग गर्ने बुझिएको छ । क्लबका खेलाडीले प्रयोग गर्ने हेलमेट, क्याप र ह्याडसमा म्यानेजमेन्टको लोगो प्रयोग हुनेछ । जनकपुरका अनिल साह र व्याटर शुभ कंस्कार यसै कलेजमा अध्ययन गरेका कारण सम्झौतालाई नवीकरण गरिएको प्रिन्सिपल जोशीले जानकारी दिए ।
‘म्यानेजमेन्टले लामो समयदेखि खेलकुदको क्षेत्रमा लगानी गरिरहेको छ । हामी जनकपुरसँग जोडिन पाउँदा असाध्यै खुशी छौं’, प्रिन्सिपल जोशीले भने ।क्लबका सहलगानीकर्ता सिग्दलले यो वर्ष उपाधि रक्षा गर्ने अभियानका साथ टोली तयार पारेको दाबी गरे । एनपिएलको दोस्रो संस्करण मंसिर १ गते काठमाडौंमा हुँदैछ । त्रिवि क्रिकेट मैदानमा हुने प्रतियोगिताको दोस्रो संस्करण फ्ल्डलाइटमा खेलाउने तयारी भइरहेको छ ।
