दमौली - गण्डकी प्रदेश कबड्डी संघले आयोजना गरेको प्रदेशस्तरीय कबड्डी प्रतियोगिताको उपाधि नवलपुर जिल्लाले जितेको छ । व्यास नगरपालिका-१ फुटसल मैदानमा आज सम्पन्न फाइनलमा कास्कीलाई पराजित गर्दै नवलपुरले उपाधि जितेको हो ।
प्रदेश खेलकुद परिषद्को आर्थिक सहयोग र जिल्ला खेलकुद विकास समिति तनहुँको व्यवस्थापनमा भएको प्रतियोगितामा म्याग्दी र गोरखा तेस्रो भएको छ । प्रथम हुने नवलपुरले रु ७० हजार, दोस्रो हुने कास्कीले नगद रु ५० हजार र तेस्रो हुने म्याग्दी र गोरखाले रु २५/२५ हजार नगद पुरस्कार प्राप्त गरेको गण्डकी प्रदेश कबड्डी संघका महासचिव राजेन्द्र क्षेत्रीले जानकारी दिए।
सोमबारदेखि सुरु प्रतियोगिताअन्तर्गत आज १० खेल आयोजना गरिएको थियो । प्रतियोगितामा तनहुँ, गोरखा, नवलपुर, कास्की, स्याङ्जा, पर्वत, बागलुङ र म्याग्दीको सहभागिता थियो ।
