मलङ्गवा - गणतन्त्र दिवसका अवसरमा नेपाली महिला राष्ट्रिय क्रिकेट टोलीकी उपकप्तान पूजा महतोलाई सर्लाहीको चन्द्रनगर गाउँपालिकाले सम्मान गरेको छ । उन्नाइस वर्षमुनिको नेपाली क्रिकेट टोलीकी कप्तान महतोलाई चन्द्रनगर गाउँपालिकाले रु ५५ हजारसहित सम्मान गरेको हो ।
उनलाई गाउँपालिकाका अध्यक्ष राजकुमार महतो तथा जिल्ला समन्वय समिति सर्लाहीका उपप्रमुख जितेन्द्र महतोले संयुक्त रुपमा सम्मान गरेका हुन् । महतोले हासिल गरेको सफलता सबैका लागि गौरवको विषय भएको गाउँपालिका अध्यक्ष राजकुमार महतोले बताए । यसबाट अन्यलाई पनि खेल क्षेत्रमा लाग्न प्रेरित गर्न मद्दत पुग्ने उनको भनाइ थियो ।
छोरासरह छोरीलाई पनि खेलकुदमा सहभागी गराइदिन कार्यक्रममा सहभागी अभिभावकसँग उनले आग्रह गरे । चन्द्रनगर गाउँपालिकाले सोही कार्यक्रममा गाउँपालिकाका दुई सहिद विद्यासागर महतो र शिवकुमार रामको परिवारलाई जनही रु २५ हजार तथा अधिकार प्राप्तीका लागि जेल जीवन निर्वाह गरेका नेपाली कांग्रेस सर्लाहीका पूर्व सभापति सत्येवसिंह दनुवारलाई समेत रु २५ हजारसहित सम्मान गरेको थियो ।
