पेरिस- – संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले फ्रान्सेली नागरिकलाई नेपाल भ्रमणका लागि आग्रह गरेका छन् ।
फ्रान्सको पेरिसस्थित नेपाली दूतावास र नेपाल पर्यटन बोर्डले संयुक्तरुपमा पेरिसमा आयोजना गरेको ‘नेपाल इभिनिङ’ कार्यक्रममा बोल्दै मन्त्री पाण्डेले फ्रान्सेली नागरिकलाई नेपाल भ्रमणका लागि आग्रह गरेका हुन् ।
मन्त्री पाण्डेले भने, 'नेपाल भ्रमण गर्न सबै फ्रान्सेली नागरिकहरूलाई हार्दिक निमन्त्रणा गर्दछौं । नेपाललाई आफ्नो यात्रा सूचीमा समावेश गर्न अनुरोध गर्दछौं ।'
मन्त्री पाण्डेले नेपाल प्राकृतिक सौन्दर्य, सांस्कृतिक सम्पदा, साहसिक खेलकुद तथा आध्यात्मको अनुपम संगम रहेको उल्लेख गर्दै नेपाल भ्रमण गर्ने पर्यटकहरूका लागि अविस्मरणीय अनुभव हुने विश्वास व्यक्त गर्नुभएको छ । उनले नेपाल सरकारद्वारा पर्यटन प्रवर्द्धनका लागि अवलम्बन गरिएका नीति तथा कार्यक्रमहरूको जानकारी गराउँदै नेपाल सुरक्षित र आकर्षक गन्तव्य रहेको जानकारी गराएका हुन्।
फ्रान्सका लागि नेपाली राजदूत महामहिम सुधिर भट्टराईले नेपाल-फ्रान्स सम्बन्धको ऐतिहासिक पृष्ठभूमि स्मरण गराउँदै नेपाल भ्रमण गर्ने फ्रान्सेली नागरिकहरूको अनुभव सधैं सकारात्मक रहनेमा विश्वास व्यक्त गरे ।
नेपाल पर्यटन बोर्डका कार्यकारी प्रमुख अधिकृत दीपक राज जोशीले नेपालको पर्यटन प्रवर्द्धनका लागि चालेका पहलहरूमाथि प्रकाश पार्दै नेपाल भ्रमण गर्ने पर्यटकहरूका लागि आकर्षक प्याकेजहरू उपलब्ध रहेको जानकारी गराएका छन् ।
कार्यक्रमको एक विशेष अवसरमा प्रसिद्ध फ्रान्सेली पर्वतारोही स्वर्गीय मौरिस हर्जोगकी पत्नी एलिजाबेथ हर्जोगलाई सम्मान प्रदान गरिएको हो । सम्मान ग्रहणपछि हर्जोगले नेपालसँगको आफ्नो विशेष सम्बन्धबारे चर्चा गर्दै नेपाल भ्रमणका सुखद अनुभवहरू अभिव्यक्त गरेका छन् ।
कार्यक्रममा करिब ६० जना पर्यटन व्यवसायी, संस्कृतिप्रेमी तथा नेपालप्रति रुचि राख्ने व्यक्तिहरूको सहभागिता रहेको थियो । कार्यक्रममा सहभागीहरुलाई नेपाल पर्यटन बोर्डले तयार पारेको प्रचार सामग्री समेत वितरण गरिएको थियो।
