काठमाडौं– कुनै सीप नसिकी वैदेशिक रोजगारीमा जाने ‘अदक्ष’ कामदारको संख्या अझै ठूलो रहेको छ । चालु आर्थिक वर्षको मंसिर महिनामा मत्रै करिब २२ हजार अदक्ष कामदार वैदेशिक रोजगारीका लागि विभिन्न मुलुकमा गएका छन् ।
वैदेशिक रोजगार विभागको तथ्यांकअनुसार मंसिरमा श्रम स्वीकृति लिएकामध्ये २१ हजार ७१६ जना अदक्ष कामदार रहेका छन् । यो उक्त महिना श्रम स्वीकृति लिएका कूल कामदार संख्याको २५.७८ प्रतिशत हो । यो तथ्यांकले पुष्टि गर्छ, सीपयुक्त कामदारमात्र वैदेशिक रोजगारीमा पठाउने सरकार नीति प्रभावकारी बन्न सकेको छैन । मंसिरमा विदेसिएका अदक्ष कामदारमा १९ हजार ३७६ जना पुरुष र दुई हजार ३४० जना महिला कामदार रहेको तथ्यांकमा उल्लेख छ ।
यद्यपि, उक्त महिनामा श्रम स्वीकृति लिने अधिकांश भने केही न केही सीप सिकेका अर्धदक्षदेखि विशेष दक्षता भएकासम्म छन् । विभागको तथ्यांकअनुसार मंसिरमा सबैभन्दा बढी ५३ हजार १५८ जना दक्ष कामदार रोजगारीका लागि विदेसिएका छन् । जसमा ४७ हजार ७४८ पुरुष र पाँच हजार ४१० जना महिला कामदार रहेका छन् । यसैगरी मंसिरमा आठ हजार ७८० जना अर्धदक्ष, ४७० जना व्यावसायिक र १०२ जना विशेष दक्षता भएका कामदार विभिन्न मुलुकमा प्रस्थान गरेका छन् ।
उक्त महिनामा रोजगारीका लागि विदेसिनेको कूल संख्या ८४ हजार २२६ जना रहेका छन् । यो संख्यामा नयाँ र पुनः श्रम स्वीकृति लिएर रोजगारीका लागि विदेसिनेहरु समेटिएका छन् । विभागको तथ्यांकअनुसार मंसिरमा नयाँ श्रम स्वीकृति लिनेको संख्या ४२ हजार ९०६ रहेको छ । जसमा महिलाको संख्या पाँच हजार ६१० र बाँकी पुरुष छन् । कूल श्रम स्वीकृति लिएकामध्ये महिलाको संख्या आठ हजार ६७१ र पुरुष ७५ हजार ५५५ रहेको छ ।
मंसिरमा विदेसिएकामध्ये व्यक्तिगत श्रम स्वीकृति लिएर जानेको संख्या बढी देखिएको छ । यस महिनामा व्यक्तिगत श्रम स्वीकृति लिएर ५४ हजार ३७९ जना गएका छन् । जसमा पुनः श्रम स्वीकृति लिने ४१ हजार ३२० र नयाँ १३ हजार ५९ जना रहेको विभागले जनाएको छ । यस्तै २८ हजार ८६८ जना म्यानपावर कम्पनीमार्फत श्रम स्वीकृति लिएर गएका छन् । जिटुजी प्रक्रियाबाट ९७९ जना रोजगारीका लागि विदेश गएको तथ्यांक छ ।
मंसिर महिनामा कूल १०० देशमा रोजगारीका लागि नेपालीहरुले गन्तव्य बनाएको देखिन्छ । जसमध्ये सबैभन्दा बढी युएईमा २४ हजार ७६९ जना पुगेका छन् । युएईपछि साउदीमा १८ हजार ११५ जना रोजगारीका लागि गएको विभागको तथ्यांकमा उल्लेख छ । यस्तै कतारमा १४ हजार ८४४, कुवेतमा छ हजार ६९० तथा मलेसियामा चार हजार ४६९ जना रोजगारीका लागि गएको विभागले जनाएको छ । धेरै कामदार जाने मुलुकको शीर्ष १० भित्र जापान, रोमानिया, क्रोएसिया, बहराइन र दक्षिण कोरिया परेका छन् ।
