काठमाडौं– साउदी अरेबियाको सरकारले अवैध रुपमा रहेका आप्रवासी कामदारहरुलाई वैध हुने अवसर दिएको छ । साउदीको मानव संशाधन तथा सामाजिक विकास मन्त्रालयले यही डिसेम्बर १ देखी २०२५ जनवरी २९ सम्म अर्थात दुई महिनाको अवधि तोकेर अवैध रुपमा रहेका विदेशी कामदारलाई वैध हुने अवसर दिएको हो ।
उक्त अवधिमा हुरुब (कम्पनी छाडेर भागेका) कामदारलाई नयाँ कम्पनीमा काम गर्न अवसर दिएको साउदीस्थित नेपाली राजदूतावासले जनाएको छ । साउदीमा हुरुब लागेका विदेशी कामदारलाई अवैध मानिने व्यवस्था रहेको छ । साउदी सरकारले ल्याएको नयाँ नियमबाट ठूलो संख्याका विदेशी कामदारलाई राहत हुने बताइएको छ । नयाँ नियमको सदुपयोग गरी नेपाली कामदारलाई फाइदा लिन पनि दूतावासले आग्रह गरेको छ । साउदीमा एक लाखको हाराहारीमा हुरुब भएका नेपाली कामदार रहेको अनुमान गरिएको छ ।
अवैध सूचीमा रहेका विदेशी कामदारले नयाँ कम्पनीमा काम गर्न किवा सिस्टममा खाता खोली नयाँ कम्पनीबाट किवामा ट्रान्सफरका लागि रोजगार सम्झौता गर्न पाउने व्यवस्था गरिएको दूतावासले उल्लेख गरेको छ । यसरी किवामा जोडिएका कामदारले १० दिनभित्र नयाँ कम्पनीले प्रस्ताव गरेको रोजगार सम्झौता स्वीकार गरेपछि अवैध सूचीबाट हटाइने बताइएको छ ।
किवा वेबसाइटमार्फत कामदारले कार्य अनुभवको प्रमाणपत्र प्राप्त गर्न, आफ्नो रोजगार सम्झौता हेरी स्वीकार÷अस्वीकार÷पुनरवलोकन गर्न, रोजगारी अन्त्य गर्न, नयाँ कम्पनीहरुबाट रोजगारीको अनुरोध प्राप्त गर्नलगायतका धेरै सुविधाहरु राखिएको हुन्छ । किवा रोजगारदाता र कामदारबीच सम्बन्ध स्थापित, नियमित र सञ्चालन गर्न साउदी सरकारद्वारा विकास गरिएको अनलाइन वेबसाइट वा प्लेटफर्म भएको दूतावासले उल्लेख गरेको छ ।
