आज साँझ दशरथ रंगशालामा साफ महिला च्याम्पियनसिप उपाधिका लागि नेपाल बंगलादेशसँग भिड्दै छ । घरेलु मैदानका समर्थकको भरपुर साथ रहने छ नै, तनावपूर्ण खेलमा भारतलाई हराएर फाइनलमा स्थान बनाएको कारण पनि उच्च मनोवलका साथ मैदानमा उत्रने तयारीमा छ नेपाली टोली । यो नेपाली महिला राष्ट्रिय टोलीका लागि सुवर्ण अवसर पनि हो । तर, प्रतिद्वन्द्वी छ डिफेन्डिङ च्याम्पियन बंगलादेश ।
न त नेपाली टोलीका सावित्रा भण्डारी ‘साम्बा’ फर्ममा छिन् । गोल मेसिनका रुपमा चिनिने साम्बाको फूर्तिलो प्रदर्शनलाई नेपाली टोलीको साथ छ । यसैले पनि ३८ वर्षदेखिको उपाधिको भोक मेट्ने प्रयासमा नेपाली टोली लागिपरेको छ । नेपाली टोलीका लागि अर्को सुखद् पक्ष भनेको साम्बासँगै, फुटबल टोलीकी कप्तान तथा गोलरक्षक अञ्जिला तुम्बापो, रेखा पौडेल, अमिशा कार्की, सविता रानामगर, रश्मी घिसिङ, गीता राना, दीपा शाही, प्रीति राई, अमृता जैसी, चन्द्रा भण्डारी, मिडफिल्डर सरस्वती हमाल र डिफेन्डर सविना चौधरी उच्च लयमा खेलिरहेका छन् ।
तर यसअघिको च्याम्पियन बंगलादेश पनि कम्तीको छैन । उसले फाइनलमा नेपाल भेट्न भुटानलाई सात गोल गरेको छ भने भारतलाई ३–१ ले हरायो । त्यसो त नेपालले पनि श्रीलंकालाई ६–० ले हराउँदै सेमिफाइनलमा भारतसँग प्रतिस्पर्धा ग¥यो । तनावपूर्ण खेलमा भारतसँग १–१ को बराबरी भएपछि खेल टाइब्रेकरमा पुगेर नेपालको पक्षमा आयो नतिजा । नेपालका लागि खुसीको विषय हो बंगलादेशी टोलीमा भएको विवाद । सिनियर खेलाडीहरु प्रशिक्षक पिटर बटलरको निर्णयको विरुद्धमा छन् । पिटरले नयाँलाई मात्र अवसर दिएको भन्दै उनीहरु असन्तुष्ट हुँदा विवाद चर्किएको हो । तर, घरझगडाले अरू कमजोर भएपछि स्वतः जितिन्छ भन्ने मानसिकता नेपालले त्याग्नुपर्छ ।
घरेलु मैदानमा आज साँझ साढे ६ बजेबाट नेपाल साफ च्याम्पियनसिप जित्ने सपना पूरा गर्न भरपुर प्रयासका साथ दशरथ रंगशालामा उत्रने छ । उपाधिका लागि फाइनलमा नेपालको प्रयास खेर जान नदिन १२औं खेलाडीको भूमिकामा दर्शकको साथ रहने निश्चित छ । यस्तो अवस्थामा यसपटक प्रशिक्षक राजेन्द्र तामाङ इतिहास रच्न तम्सिएका देखिन्छन् । घरेलु मैदान र दर्शकको साथलाई अतिरिक्त ऊर्जाको रुपमा लिने तयारीमा छन् प्रशिक्षक तामाङ । सन् १९८६ बाट उपाधिका लागि अन्तर्राष्ट्रिय खेल थालेको नेपाली महिला टोलीका लागि आजको खेल निकै महŒवपूर्ण हुने छ नै । ३८ वर्षदेखिको उपाधिको धोको आज पूरा होस्, चेलीहरुलाई हार्दिक शुभकामना ।
