काठमाडौं– इजरायलले गत मंगलबारबाट हिजबुल्लाह लडाकुलाई निशाना बनाएर लेबनानमाथि निरन्तर हवाई आक्रमण गरिरहेको छ । उक्त आक्रमणका कारण त्यहाँ रहेका आप्रवासीहरुमा ठूलो त्रास फैलिएको छ । युद्धका कारण बढ्दो जोखिमलाई मध्यनजर गर्दै अमेरिका, क्यानडा, जापानलगायतका देशले आफ्ना नागरिकलाई स्वदेश फर्काउन थालिसकेका छन् ।
यता नेपाल सरकारले भने लेबनानमा भएका नेपालीहरुलाई फर्काउने कुनै तयारी गरेको छैन । सरकार लेबनानमा रहेका आफ्ना नागरिक सुरक्षित भएको भन्दै बसेको छ । लेबनानमा रहेका नेपालीको अवस्थाबारे इजिप्टको कायरोस्थित नेपाली दूतावाससँग परराष्ट्र मन्त्रालयले जानकारी लिइरहेको जनाएको छ । तर, त्यहाँ रहेका नेपालीलाई फर्काउनेसम्बन्धी कुनै तयारी गर्न निर्देशन दिएको छैन । मन्त्रालयले गत साता एक विज्ञप्ति जारी गर्दै लेबनान र इजरायलमा कार्यरत नेपाली कामदारलाई सुरक्षित बस्न आग्रह गरे पनि स्वदेश फिर्ता गराउने विषयमा बोलेको छैन भने अप्ठ्यारोमा परेकाहरुलाई कायरोस्थित दूतावास र बेरुतमा रहेको अवैतनिक वाणिज्यदूतावासमा सम्पर्क गर्न भनेको छ ।
आइतबारमात्रै परराष्ट्रमन्त्री डा. आरजु राणाले इजरायल र लेबनानमा रहेका नेपालीहरुको अवस्थाबारे जानकारी लिएर ‘अपडेट’ भइरहन सम्बन्धित नेपाली दूतावासहरुलाई निर्देशन दिएकी छन् । उनले ‘भर्चुअल’ बैठकमार्फत इजरायल र लेबनानमा विकसित पछिल्लो परिस्थितिका बारेमा जानकारी लिएकी थिइन् । मन्त्री राणाले सम्बन्धित देशका राजदूतहरुलाई त्यहाँ रहेका नेपाली र उनीहरुको परिवारको सम्पर्कमा रहेर आवश्यक सहयोग गर्न निर्देशन दिए पनि स्वदेश फर्काउने तयारी सम्बन्धमा केही बताइनन् ।
मन्त्री राणाले सम्बन्धित देशका दूतावासहरुलाई सूचना जारी गरी सम्पर्क व्यक्ति तोक्न र आवश्यकताअनुसारका ‘हेल्प डेस्क’ स्थापना गरेर समस्यामा परेका नेपालीलाई आवश्यक समन्वय र सहायता प्रदान गर्न निर्देशन दिएको मन्त्रालयले जनाएको छ । लेबनानमा रहेका नेपालीको अवस्थाबारे कायरोस्थित नेपाली दूतावासले जानकारी लिइरहेको परराष्ट्र मन्त्रालयका प्रवक्ता अमृतकुमार राईले बताए । ‘लेबनानमा रहेका कोही नेपाली समस्यामा नपरेको र त्यहाँ रहेका नेपाली सुरक्षित रहेको सूचना दूतावासले दिएको छ,’ उनले भने, ‘युद्ध चर्किंदै गए त्यहाँ रहेका नेपाली फर्काउन सरकारले पहल गर्छ, यसका लागि छलफल पनि भइरहेको छ ।’
लेबनानमा १२ सयभन्दा बढी नेपाली कार्यरत रहेको र उनीहरुमध्ये अधिकांश घरेलु कामदार रहेको कायरोस्थित दूतावासले जनाएको छ । लेबनानमा शान्ति स्थापनार्थ ८५० जना नेपाली शान्ति सैनिक तैनाथ रहेको बताइन्छ । इजरायली हवाई हमलाका कारण एक लाखभन्दा बढी मानिस लेबनान छाडेर सिरिया गएको राष्ट्रसंघीय शरणार्थी उच्चायुक्तको कार्यालयले जनाएको छ । युद्धकै कारण लेबनानमा बसोबास गर्दै आएका विदेशी नागरिकले देश छाड्न थालेका छन् । तर, नेपाल सरकारले आइतबारसम्म पनि आफ्ना नागरिक स्वदेश फर्किन आग्रहसमेत गरेको छैन ।
