काठमाडौं– वैदेशिक रोजगार विभागले इजरायलको दीर्घकालीन स्याहार केन्द्रमा सहायक कामदार (केयर गिभर)को रुपमा जानका लागि आवेदन दिएकामध्ये तीन हजार ४६१ जनाको आवेदन स्वीकृत गरेको छ । चार हजार २४ जनाले आवेदन दिएकोमा आवश्यक कागजात परीक्षणपश्चात् उक्त संख्यामा आवेदन स्वीकृत गरिएको विभागले सोमबार जानकारी दिएको छ ।
विभागले सोमबार जारी गरेको सूचनामा स्वीकृत भएका तीन हजार ४६१ आवेदनमध्ये एक हजार ८६३ पुरुष र एक हजार ५९८ महिला रहेको उल्लेख गरिएको छ । आवेदन दिएकामध्ये ३२१ जनाको आवेदन रद्द गरिएको र कागजात नपुगेका २४२ जनाको आवेदन फिर्ता पठाइएको उल्लेख छ ।
विभागले स्वीकृत गरेका आवेदन इजरायलको सरकारी निकाय पिबालाई पठाएको जनाएको छ । पिबाले ‘नेम चेक’को नतिजा पठाएपश्चात् सफल उम्मेदवारहरुलाई मात्रै इजरायल सरकारको छनोट कार्यक्रममा समावेश गराइने विभागले जनाएको छ ।
इजरायलले सुरुमा ५०० जना मुख्य उम्मेदवार र ३०० जना वैकल्पिक गरी ८०० जना नेपालीलाई केयर गिभरमा लैजान आवेदन माग गरे पनि यो संख्यालाई बढाएर दुई हजार पु¥याएको थियो । जसमा मुख्य उम्मेदवार र वैकल्पिक उम्मेदवार एक÷एक हजार भनी उल्लेख गरिएको छ । जसअन्तर्गत ६० प्रतिशत महिला र ४० प्रतिशत पुरुष कामदार लैजाने इजरायली नीति रहेको छ । तर आवेदन दिने नेपालीको संख्या महिलाभन्दा पुरुष बढी रहेको छ ।
इजरायलले दीर्घकालीन स्याहार केन्द्रमा बच्चा, युवा तथा ६५ वर्ष ननाघेका गम्भीर अपांगता भएका व्यक्तिको हेरचाह तथा स्याहार गर्न नेपालबाट केयर गिभरको माग गर्दै आएको जनाएको छ । यसअघि नेपालबाट केयर गिभरमा काम गर्न झण्डै १२ सय नेपाली इजरायल गइसकेको विभागले जनाएको छ । केयर गिभरमा छनोट हुनेले मासिक पाँच हजार ८८० सेकेल इजरायली मुद्रा अर्थात् दुई लाख १० हजार रुपैयाँभन्दा बढी पारिश्रमिक पाउने छन् भने करार अवधि सुरुमा एक वर्षको हुने छ । त्यसपछि बढीमा पाँच वर्षसम्म थप गर्न पाइने छ ।
यसै सन्दर्भमा इजरायलमा कामदार पठाउने प्रक्रिया जिटुजीअन्तर्गत पर्ने भएकाले छनोट प्रक्रिया निष्पक्ष र पारदर्शी हुने उल्लेख गर्दै अनधिकृतरुपमा रकम संकलन भइरहेको जानकारी आएको भन्दै यसप्रति विभागको गम्भीर ध्यानाकर्षण भएकोसमेत उल्लेख गरिएको छ । तसर्थ कतिपय व्यक्ति÷समूहबाट छनोट प्रक्रियाबारे फैलाइएका भ्रममा नपर्न र अनधिकृतरुपमा रकम नबुझाउन पनि विभागले सम्बन्धित सबैमा आग्रह गरेको छ । यसअघि असार १३ गते इजरायलमा जान इच्छुक कामदारहरुको आवेदन आह्वान गरेलगत्तै विभागले एक सूचना जारी गर्दै गैरकानुनीरुपमा प्रलोभनमा पारी रकम ठगी गर्ने गिरोह सक्रिय भएको भन्दै सचेतता अपनाउन आग्रह गरेको थियो ।
