काठमाडौं – नेपाल वैदेशिक रोजगार व्यवसायी संघको साधारणसभा हुने निश्चित भएको छ । संघले आफ्नो ३२औं स्थापना दिवसको अवसर पारेर भोलि असार १७ गते साधारणसभा गर्ने निर्णय गरेको हो ।
संघले आफ्नो विधान, २०४९ लाई समयसापेक्ष संशोधन र परिमार्जन गर्ने, व्यवसायी भलाइ कोष स्थापना तथा सञ्चालन कार्यविधि पारित गर्ने, गरिएका क्रियाकलाप र भावी योजना उल्लेख गरिएको प्रतिवेदन सार्वजनिक गर्नेलगायतको एजेण्डा साधारणसभामा प्रस्तुत गर्ने जनाएको छ । साधारणसभामा सहभागी हुनका लागि समयमै कम्पनीको प्रतिनिधि विवरण बुझाउन संघले आग्रह गरेको छ । यसका लागि आज (आइतबार)सम्मको समय दिइएको छ ।
यसपटक हुने साधारणसभाले संघको हितका निम्ति महŒवपूर्ण र दूरगामी प्रभाव पार्न योगदान दिने संघका महासचिव मेघनाथ भुर्तेलले बताए । ‘३० वर्षको अन्तरालमा विधान संशोधन तथा परिमार्जन गर्ने महŒवपूर्ण कार्य हुँदै छ,’ उनले भने, ‘मौजुदा विधानमा भएको कार्यसमितिको दुई वर्षे कार्यकाललाई तीन वर्ष बनाउने र संघलाई महासंघको संरचनामा लैजाने तयारी छ ।’ तत्कालै प्रादेशिक संरचनामा जाने कुनै योजना नभए पनि संघीय संरचनामा रहने गरी महासंघ बन्ने महासचिव भुर्तेलले बताए ।
संघमा अध्यक्ष हुन कम्तीमा एक कार्यकाल पदाधिकारी भई काम गरेकोे हुनुपर्ने व्यवस्था छ । उक्त व्यवस्थाका कारण योग्य तथा क्षमतावान व्यवसायीलाई रोक्ने र पूर्वपदाधिकारी व्यवसायीलाई मात्रै अध्यक्षको उम्मेदवार बन्ने अवस्था भएकाले यसलाई पनि परिमार्जन गरी सबै व्यवसायीले प्रतिश्पर्धा गर्न सक्ने गरी विधान संसोधन गर्न लागिएको पनि बुझिएको छ । यसैका लागि व्यवसायीले पटक–पटक आवाजसमेत उठाउँदै आएका छन् । यदि विधान संशोधनको प्रस्ताव पारित भएमा वर्तमान कार्यसमितिले आफ्नो कार्यकालको थप एक वर्ष बढी काम गर्न पाउने छ ।
