जमाना स्मार्ट मोबाइलको छ । मान्छे जेसुकै होस् स्मार्ट मोबाइल भएपछि सबथोक हुन्छ भन्ने छ उसलाई । त्यही भएर मोबाइल तेस्र्याउँदै बन्दु कुडारी मनमा लागेजति फलाक्दै ‘लाइभ’ भन्दै दगुर्दै हिँड्छ । हावादारी लाइभ भन्दै हिँडेका कारण अस्ति कुडारीको झण्डै गर्धन मालिस भाको रे !
आज पनि उसको ताल त्यही छ । आयु त बजियाको लामै रैछ । आइपुग्यो ! होइन कहाँ दगुरेका छौं हो कुडारी भाइ ? कहाँ हुनु नि मट्यांग्रा दाजु, अस्ति झण्डै हण्डी नै खुस्काका थिए त्यतैतिर गएर आको । हैन तिमीले गर्छौं चाहिँ के ? के गर्नु नि दाजु । थाहा नपाएको जस्तो नगर्नु न ? म त पत्रकार नि । हैन हो कुडारी भाइ, ल भन त पहिले त तिमी पत्रकार हैनौं । अहिले एक्कासि कसरी पत्रकार भयौं ? १० हजारको मोबाइल बोक्यो दगुरेकै भरमा पत्रकार बन्न पाइने हो र भन्या ? नत्र मलाई पनि बताइदिनुप¥यो । यस्तो सजिलो हुन्छ भने त ।
ह्या दाइ पनि जिस्कनुहुन्छ । कहाँ त्यत्ति सजिलो छ र ? अस्ति झण्डै हण्डी खुस्काका हैनन् भन्या ? त्यो त थाहा पाएँ । अब तिमी पनि गज्जबकै रिपोर्टिङ गर्दा रै’छौं । अनि तिम्रा हण्डी नचिलाएर कसका चिलाउँछ त ? अहिलेको त भाइ पत्रकारिता भन्दा पनि ‘पर्चाकारिता’ हो भन्दा ठीक हुन्छ ! पत्रकारिता भन्न न नहुने भइसक्यो । कसलाई लोग्ने स्वास्नी लडे, कसले लोग्ने छाड्यो कसले स्वास्नी भगायो त्यस्तो पनि सम्चार हुन्छ ?
दाइले कुरो बुझे पो ! कण्टेण्ट हो के दाइ । अहिले विकास निकासका कुरा छाडिदिनुस् । झ्याप्पै कण्टेण्ट हान्दिने हो । भ्युज हेर्नुस् दाइ, अनि पो कुरा हुन्छ त ? त्यही त कुडारी भाइ, अहिले त भाइहरुको युट्युबमा व्यापक हो नि । त्यसमा चिन्तै मान्नु पर्दैन । भाइहरुको ठूलो संघर्ष छ नि यसमा त । न दर्ता, न ठूलो लगानी ! झ्याप्पै मोबाइलबाट च्याप्पै पार्दिगो क्या गज्जबको टिभी ! त्यही भएर भाइहरुलाई शुद्ध गर्न खोज्या रै’छ ।कहाँ शुद्ध दाइ ?
ल भाइहरुको छाता संस्थाले शुद्धीकरण गर्न खोज्या होइन ? चौतारी–युनियन–सेण्टर महासंघले ? त्यही भएर त चुनाउ हुन सकेन रे त ! ए दाइ पत्रकार महासंघको कुरा गर्नु भाको ? ल कसरी पत्रकार महासंघको कुरा ? चौतारी–युनियन–सेण्टर सकेसम्म भागबण्डा नसके फण्डै फण्डा गर्ने ठाउँलाई कसरी महासंघ भन्ने त ? दाजुको कुरा पनि ठीकै हो । त्यही भएर आफूहरु त त्यसमा बसेको पनि छैन ! यतै फण्डा मच्चाउने हो ? यता फण्डाले आफैंलाई केही लाभ हुन्छ त्यो फण्डामा गए नेतालाई मात्र फलिफाप हुन्छ ।
ल भाइहरु गएको भन्दा नगएको ठीकै भो जस्तो लाग्यो अभियान नै शुद्धीकरण छ नि । भाइहरु ट्यूवेहरुलाई त्यहाँ के काम र जानु । साँच्चिकै पर्चाकारिता (पत्रकारिता कसरी भन्नु) गर्नेहरु मात्र बस्ने हो नि त त्यहाँ ? शुद्धीकरण भनेको लेख्ने बोल्नेहरुलाई शुद्ध पार्नका लागि त्यहाँबाट पन्छाउने हो नि त ! कुडारी मट्यांग्राका कुरा सुनेर तीन छक्क पर्छ ? हो नि साँच्चै शुद्धीकरण भनेर लेख्नेलाई फाल्देपछि त सतप्रतिशत शुद्धीकरण भईगो नि ? लौ भन त त्यसपछि त कागको बथान कागसँगै बकुल्लाको बथान बकुल्लासँगै क्या काइदा !
हो हो दाजुले ठीक कुरा गर्नु भो । उही केही केही मसानेहरुले मिसन ८४ भनेजस्तै हो । काम गर्नु छैन । मिसन ८४ भनेर हिँडे जस्तै हो । अनि मट्यांग्रा दाजु तपाईं पनि निकै खुल्दुली गरिरहुनपर्ने मान्छे, अब के होला ८४ को यात्रा ?शुद्धीकरण भाइ शुद्धीकरण । अब जताततै शुद्धीकरण गर्ने हो । त्यो अव तिमरकै महासंघ त तिरिमिरी झ्याइँ भइसक्यो ? अरूका के कुरा । तीन दल, तीन सरकार, वरिपरि घनचक्करै घनचक्कर ।
वकिल पनि पत्रकार, कलाकार पनि पत्रकार, मोबाइल बोक्यो, बुम बोक्यो अनि पत्रकार । होटल चलायो पत्रकार ! ठेक्कापट्टाबाट कमायो पत्रकार । हाउजिङ चलाउने पत्रकार, औषधि बिक्रेता पत्रकार अझ अझै औषधि फेसबुकमा लेखेर पोस्ट्याउने पनि पत्रकार ?
पत्रकारजति ‘अ’पत्रकार अनि भएन उत्कृष्ट काम ? त्यही भएर पत्रकारलाई शुद्धीकरण ‘अ’पत्रकारलाई भित्रीकरण गर्ने खेल हो रे नि त !
ए बाबा, अनि भनेकै छन् त शुद्धीकरण भनेर । तिमी शुद्धलाई शुद्धीकरण गर्ने । अशुद्धताको प्रतीक । दाइले भनेको ठीकै हो बिगारेकै हामीले हो । सबैभन्दा माथि देश हुनुपर्ने थियो तर भएन । सबैभन्दा माथि दल, दलमाथि गुट र उपगुट भएकै कारण यस्तो हविगत भाको रे नि त ?शुद्धीकरण गरौं मिलेर सदस्यता बाँडौं, पद बाँडफाँड गरौं भइगो । तीन संगठन एकत्रित मिलीजुली पद पाएपछि के को शुद्धीकरण ? शुद्ध नै गर्ने हो भने त शिरबाट नै सुरू गर्नुपर्ने हो । तर त्यसो हुन सकेको छैन ।
त्यही त दाइ हुने त त्यस्तै हो । बालै भएन नि ! क्यामरा भए बोक्ने नभएर ठोक्ने । त्यसै शुद्धीकरण शुद्धीकरण बनेको हो ? आऊ, सबै मिलेर शुद्धीकरण गरौं । काम गर्नेलाई बाहिर फालौं । काम नगर्नेलाई आफ्नै सिण्डिकेटभित्र राखौं । जय प्रेस, जय पर्चाकारिता ।
