काठमाडौं– पूर्वप्रधानमन्त्री एवं नेपाली कांग्रेसका सभापति शेरबहादुर देउवाले वैदेशिक रोजगार व्यवसायीका समस्या समाधान गर्न कांग्रेसले पहल गर्ने बताएका छन् । नेपाली कांग्रेसको सुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसिएसनको नवनिर्वाचित कार्यसमितिसँग शनिबार भएको भेटमा उनले वैदेशिक रोजगार व्यवसायीले भोग्नुपरेका समस्या समाधानका लागि कांग्रेसले पहल गर्ने बताए । सभापति देउवाले व्यवसायीका समस्याबारे पार्टीले संसद्मासमेत कुरा उठाउने प्रतिबद्धता व्यक्त गरेको एसोसिएसनका अध्यक्ष दीपक थापाले बताए ।
एउटा म्यानपावर कम्पनीले वार्षिक १०० जना श्रमिकलाई अनिवार्यरूपमा विदेश पठाउनुपर्ने सरकारको बाध्यकारी नीतिले समस्या भएकोले उक्त नीति पुनरावलोकनका लागि पहल गरिदिन सभापति देउवासँग आग्रह गरिएको उनले बताए । उनले म्यानपावर कम्पनीले बैंक तथा वित्तीय संस्थामा राखेको धरौटी रकम धेरै भएकाले त्यसमासमेत पुनर्विचार गर्नुपर्ने आवश्यकता रहेको बताए ।
भेटमा पार्टी उपसभापति पूर्णबहादुर खड्का, पार्टीको वैदेशिक रोजगार समन्वय तथा आप्रवासन विभागका प्रमुख प्रकाश रसाइली, कांग्रेस केन्द्रीय सदस्य सीता देवकोटा, कांग्रेस केन्द्रीय कार्यालयका मुख्यसचिव एवं राष्ट्रिय सभा सांसद कृष्णप्रसाद पौडेललगायतको सहभागिता रहेको थियो ।
यसअघि बिहीबार वैदेशिक रोजगार व्यवसायी संघ र विभिन्न पार्टीनिकट व्यवसायी संघसंस्थाका प्रतिनिधिले श्रम तथा रोजगारमन्त्री डोलप्रसाद अर्याललाई भेटेर वैदेशिक रोजगार व्यवसायका क्षेत्रमा देखिएका समस्या समाधानका लागि आग्रह गरेका थिए ।
-1755862759.jpeg)
