काठमाडौं– युद्धरत क्षेत्रमा रहेका नेपाली आप्रवासी श्रमिकको जीवन रक्षा, अवस्थाबारे जानकारी माग गर्दै यथाशीघ्र सुरक्षित स्वदेश फिर्ता ल्याउन अधिकारवादी संस्थाहरुले अपिल गरेका छन् । हाल रुस र युक्रेनबीच चलिरहेको युद्धमा ठूलो संख्यामा नेपाली आप्रवासी श्रमिकहरूलाई प्रत्यक्ष वा अप्रत्यक्ष रूपमा संलग्न गराइएको भन्दै उनीहरुको सुरक्षित स्वदेश फिर्तीका लागि आप्रवासी श्रमिक र श्रमिकका परिवारको हक अधिकारका क्षेत्रमा क्रियाशील सुरक्षित आप्रवासनका लागि राष्ट्रिय सञ्जाल (एनएनएसएम) र संयुक्त ट्रेड युनियन समन्वय केन्द्र (जेटियुसिसी) ले संयुक्त अपिल गर्दै सरकारको ध्यानाकर्षण गराएका छन् ।
दुई संस्थाले जारी गरेको सयुक्त अपिलमा युद्धरत क्षेत्रमा रहेका नेपाली आप्रवासी श्रमिकहरूको यथार्थ जानकारी बाहिर नआउनु र परिवारसँग उनीहरूको सम्पर्क हुन नसक्नुले त्यहाँ रहेका नेपाली श्रमिकहरूको अवस्था गम्भीर रहेको उल्लेख गरिएको छ । जुनसुकै कारण वा माध्यमबाट युद्धरत क्षेत्रमा पुगेका वा सैनिक भर्नासम्बन्धी अन्तर्राष्ट्रिय मापदण्डविपरीत युद्धमा संलग्न गराइएको भए पनि उनीहरूको अवस्थाको जानकारी परिवारले पाउनुपर्ने र संकटमा परेका नेपालीहरूको सुरक्षाको दायित्व नेपाल सरकारले लिनुपर्नेमा जोड दिइएको छ ।
पीडित परिवारहरूले गरेका मागको प्रभावकारी सुनुवाइ हुन नसक्नुका साथै त्यहाँ मृत्यु हुने श्रमिकको संख्या दिनप्रतिदिन थपिँदै जानुले समस्या थप जटिल बन्दै गएको अपिलमा उल्लेख छ । तसर्थ नेपाल सरकारले प्रतिबद्धता जनाएका मानवअधिकारसम्बन्धी अन्तर्राष्ट्रिय कानुन, नेपालको संविधान र आप्रवासी श्रमिक र तिनका परिवारको अधिकारसम्बन्धी महासन्धिको प्रावधानले आफ्ना नागरिकको शान्ति सुरक्षा र अवस्थाका बारेमा राज्यले पूरा गर्नुपर्ने दायित्वलाई स्पष्ट पारेको पनि सरकारलाई स्मरण गराइएको छ ।
द्वन्द्व प्रभावित क्षेत्रमा जोखिमपूर्ण वा उच्च जोखिमको कामका लागि नेपाली आप्रवासी श्रमिकको भर्तीलाई रोक्न उच्चस्तरको तहबाट तत्काल आवश्यक कदम चाल्न पनि नेपाल सरकारसमक्ष संयुक्त अपिलमार्फत जोडदार माग गरिएको छ ।
