थाइल्यान्ड – एसीसी टी–२० इस्टर्न रिजन–२०२० को पहिलो खेलमै नेपालले नमिठो हार ब्यहोरेको छ । थाइल्यान्डको बैंककस्थित टेर्डथाई क्रिकेट मैदानमा मलेशियासँग पहिलो खेल खेलेको नेपालले २२ रनको नमिठो पराजय भोग्यो ।
च्याम्पियन बन्ने लक्ष्यका साथ थाइल्याण्ड पुगेको नेपालले पहिलो खेलमै मलेसियासँग ११ वर्षपछि पहिलो हार भोगेको छ । नेपालले त्यसयता भएका पाँच वटै भेटमा जित हात पारेको थियो ।
शनिबार बैंककस्थित टेर्डथाई क्रिकेट मैदानमा मलेसियाले नेपाललाई २२ रनले हराएको हो । पहिलो ब्याटिङ गरेको मलेसियाले दिएको १५५ रनको लक्ष्य पछ्याएको नेपालले १३२ रनमा सबै विकेट गुमाउँदै मलेसियालाई खेल सुम्पियो ।
नेपालका लागि पहिलोपटक सिनियर टिममा ओपनिङ गरेका कुशल मल्ल शुन्य रनमा आउट भए त्यसपछि पूर्वकप्तान पनि ९ रन बनाउँदै आउट भएपछि नेपाल संकटमा परेको थियो । तर, त्यसपछि ब्याटिङका लागि आएका कप्तान ज्ञानेन्द्र मल्ल र उपकप्तान दीपेन्द्र सिंह ऐरीले नेपालको पारी सम्हाल्दै तेस्रो विकेटका लागि ६७ रनको साझेदारी गरे । कप्तान मल्ल ३८ रनमा आउट भए । चौथो विकेटका रूपमा ऐरी ३८ रनमा आउट भए, जतिबेला नेपालको स्कोर ११० रन थियो । त्यसपछि १७औं ओभरमा पवन सर्राफ १९ रन बनाए आउट भए भने १८औं ओभरमा आरिफ शेख आउट भए ।
आरिफले ५ रन जोडे । १९औं ओभरमा पनि नेपालले विकेट गुमायो । करण केसीले मात्र २ रन बनाए पेभलियन फर्किए । अन्तिम ओभरमा मात्र नेपालले तीन विकेट गुमाएको थियो । विनोद भण्डारी ७ रन बनाएर आउट भए भने सन्दीप लामिछाने १ रन बनाएर आउट भए । यस्तै सुशन भारी डकआउट भए । मलेसियाका लागि शर्भिन मुनिएन्डीले अन्तिम ओभरमा ३ विकेट लिए । मुनिएन्डीले कूल ४ विकेट लिए । पवनदिप सिंह, सयजरुद एजत इयुस, खिजर हायत दुरानीले २÷२ विकेट लिएका थिए ।
त्यसअघि टस जितेर पहिले ब्याटिङ गरेको मलेसियाले सायद अजिज सायद मुबारकको अर्धशतक मद्दतमा २० ओभरमा ६ विकेट गुमाएर १५४ रन बनाएको थियो । मलेसियाका लागि सायद अजिज सायद मुबारकले अर्धशतक बनाए । उनले अविजित रहँदै सर्वाधिक ५१ रन बनाए । ओपनर मोहम्मद अजवर अरुदिनले ३१, कप्तान अहमद फैज मोहमद नुरले ३० र अमिनुदिन रामलीले २९ रन जोडे । नेपालका लागि सन्दीप लामिछानेले ३ विकेट लिँदा अभिनाश बोहराले २ हात पारे । खेलमा मलेसियाका शर्भिन मुनिएन्डी म्यान अफ द म्याच घोषित भए ।
सन्दीपको १०० विकेट
मलेसियाको पहिलो विकेट लिएसँगै सन्दीप टी–२० क्रिकेटमा १०० विकेट पूरा गर्ने पहिलो नेपाली खेलाडी बने । खेलको तेस्रो ओभरमै बलिङ गरेका सन्दीपले भिरनदिप सिंहलाई आउट गरेका थिए । त्यही ओभरमा उनले खिजार हायत दुरानीलाई डक आउट गराए । त्यो ओभरमा सन्दीपले २ विकेट लिँदै कुनै रन दिएनन् ।
नवौँ ओभरमा सन्दीपले अनवर अरुलिनलाई आउट गर्दै तेस्रो विकेट लिएका थिए । सन्दीपले ४ ओभरमा १ ओभर मेडन राख्दै २२ रन खर्चेर ३ विकेट लिए । नेपालका लागि अभिनाश बोहोराले २ विकेट लिए भने करण केसीले १ विकेट लिएका थिए । प्रतियोगिता अन्तर्गतको नेपालले दोस्रो खेलका रूपमा आइतबार हङकङसँग खेल्नेछ ।
