काठमाडौं - आइसिसी एकदिवसीय क्रिकेट विश्वकप–२०२३ को उपाधि अस्ट्रेलियाले जितेको छ । आइतबार अहमदाबादमा भएको फाइनलमा घरेलु टोली भारतलाई छ विकेटले पराजित गर्दै अस्ट्रेलियाले विश्वकपको उपाधि हात पारेको हो ।
अस्ट्रेलिया योसँगै छैटौं पटक विश्वविजेता बनेको छ । अस्ट्रेलियाले यसअघि सन् १९८७, सन् १९९९, सन् २००३, सन् २००७ र सन् २०१५ मा उपाधि चुमेको थियो ।प्रतियोगितामा अपराजित रहेको भारतले प्रस्तुत गरेको २४१ रनको लक्ष्य अस्ट्रेलियाले चार विकेटको क्षतिमा ४३ ओभरमा पूरा ग¥यो । अस्ट्रेलियाको जितमा ट्राभिस हेडले १३७ रनको शतकीय पारी खेले । उनलाई मार्नुस लबुसेनले साथ दिए । लबुसेनले अविजित ५८ रन बनाए । साथै मिचेल मार्सले १५ र डिभेड वार्नरले सात, स्टेभन स्मिथले चार र ग्लेन म्याक्सवेलले अविजित दुई रन बनाए । भारतका लागि जसप्रित बुमराहले दुई तथा मोहम्मद शामी र मोहम्मद सिराजले एक÷एक विकेट लिए ।
त्यसअघि टस हारेर पहिले ब्याटिङको निम्तो पाएको भारतले निर्धारित ५० ओभरमा सबै विकेट गुमाउँदै २४० रन बनाएको थियो । उसका लागि विकेटकिपर केएल राहुलले १०७ बलमा ६६ रन बनाए । विराट कोहलीले ५४ र कप्तान रोहित शर्माले ४७ रन बनाए । साथै, सूर्यकुमार यादवले १८, कुलदीप यादवले १०, रविन्द्र जडेजा र मोहम्मद सिराजले नौ÷नौ रन बनाए । अन्य ब्याटरले भने उल्लेखनीय योगदान गर्न सकेनन् ।
अस्ट्रेलियाका लागि मिचेल स्टार्कले तीन विकेट लिए भने जोस हेजलउड र प्याट कुमिन्सले दुई÷दुई विकेट लिए । साथै ग्लेन म्याक्सवेल र अदाम जाम्पाले एक÷एक विकेट लिए ।प्रतियोगितामा अस्ट्रेलियाले खराब सुरुआत गरेको थियो । समूहचरणका दुई खेलमा अस्ट्रेलिया पराजित भएको थियो जसमा एक हार भारतसँग थियो । तर, समूहचरणमा बेहोरेको हारको बदला उसले फाइनलमा लिएको छ ।
सेमिफाइनलमा अस्ट्रेलियाले साउथ अफ्रिकालाई पराजित गर्दै भारतसँगको फाइनल भेट पक्का गरेको थियो । भारत भने न्युजिल्याण्डलाई हराउँदै फाइनलमा पुगेको थियो । प्रतियोगितामा सबैभन्दा बलियो मानिएको भारतले घरेलु मैदानमा उपाधि रक्षा गर्ने अनुमान अन्ततः गलत सावित भएको छ । सन् २०११ पछि उपाधिविहीन रहेको भारतले १२ वर्षपछि उपाधि हात पार्ने आशामा रहेका भारतीय क्रिकेट समर्थक पुनः एकपटक स्तब्ध बनेका छन् ।
