नेपाली पहिरनमा सजिएर ज्याकले ग्रामीण भेगका भिडियो बनाइरहेका छन् । फर्पिङ र खोटाङ उनलाई एकदमै मन परेका स्थान हुन् । मुस्ताङ पुग्न उनलाई एकदमै रहर छ । सुरुमा ट्रेकिङ गर्न, यहाँको संस्कृतिको अनुभव बटुल्न उनले नेपाल रोजेका थिए । नेपालका हिमाल, संस्कृति र यहाँका मानिसहरुको मीठो आतिथ्यताले लोभ्याएपछि उनले नेपाल बसाइँ लम्ब्याएका छन् ।
काठमाडौं– कयौं नेपाली युवाका लागि अस्ट्रेलिया सपनाको देश हो । लाखौं खर्च गरेर अस्ट्रेलिया जान मरिहत्ते गर्ने तमाम युवाहरु छन् । आफ्नो सुन्दर भविष्य खोज्न नेपालीहरु अस्ट्रेलियालाई गन्तव्य बनाउन चाहन्छन् । तर, एक अस्ट्रेलियन युवा ज्याक टोर भने नेपालको गाउँ–गाउँमा पुगेर रमिरहेका छन् । नेपालको पर्यटन, कला, संस्कृतिलाई प्रवर्द्धन गर्न समर्पित भएका छन् उनी ।
२४ वर्षीय ज्याक अस्ट्रेलियाको जागिर छाडेर नेपाल आइपुगेका हुन् । नेपालमा उनको यो छैटौं भ्रमण हो । पेसाले युट्युबर ज्याकको युट्युब च्यानल ‘ज्याक टर’लाई ४० हजारभन्दा धेरैले सब्स्क्राइब गरेका छन् । नेपालका विभिन्न स्थानमा पुगेर उनले पर्यटन, कला, संस्कृति, जात्रा, खानपान र जीवनशैलीका भिडियोहरु बनाइरहेका छन् । उनका भिडियोले दर्शक तानिरहेका छन् ।
अस्ट्रेलियन युट्युबर ज्याकले नेपालका विभिन्न स्थानहरु पुगेर बनाएका भिडियोलाई संसाभर रुचाइएको छ । मार्केटिङमा ब्याचलर्स (स्नातक) गरेका उनी अस्ट्रेलियामा एक कर्पोरेट अफिसमा काम गर्थे । यात्रा गर्नकै लागि उनले ४० लाख रुपैयाँको जागिर त्यागेको बताएका छन् । हाल युट्युबबाट उनले मासिक एक लाख रुपैयाँभन्दा बढी आम्दानी गरिरहेको बताउँछन् ।
‘त्यो बेला जम्मा गरेको पैसाले म नेपाल घुमिरहेको छु । अन्य देश पनि यात्रा गरिरहेको छु,’ ज्याकले भने, ‘नेपालका गाउँघर घुम्न, नेपाली जीवनशैली बुझ्न एकदम मनपर्छ । दालभात र मोमो (मःमः) एकदमै मनपर्यो ।’
नेपाली पहिरनमा सजिएर ज्याकले ग्रामीण भेगका भिडियो बनाइरहेका छन् । फर्पिङ र खोटाङ उनलाई एकदमै मन परेका स्थान हुन् । मुस्ताङ पुग्न उनलाई एकदमै रहर छ । सुरुमा ट्रेकिङ गर्न, यहाँको संस्कृतिको अनुभव बटुल्न उनले नेपाल रोजेका थिए । नेपालका हिमाल, संस्कृति र यहाँका मानिसहरुको मीठो आतिथ्यताले लोभ्याएपछि उनले नेपाल बसाइँ लम्ब्याएका छन् ।
वर्षमा १५० दिनमात्र उनले भिसा पाउने गरेका छन् । एक वर्षकै भिसा पाउने हो भने अझ नेपालको पर्यटन, संस्कृति र जीवनशैलीलाई प्रवर्द्धन गर्न लागि पर्ने उनी बताउँछन्। नेपाली भाषासमेत बोल्न थालेका उनले छिट्टै नै नेपाली भाषाको युट्युब च्यानल सुरु गर्ने तयारी गरिरहेका छन् ।
विश्वका एक दर्जनभन्दा बढी मुलुकको यात्रा गरिसकेका ज्याक भुटान र जापान त्यहाँको सरकारकै निमन्त्रणामा घुमिसकेको बताउँछन् । विभिन्न देशले निम्तो दिए पनि नेपालको विशेष माया लाग्ने उनको भनाइ छ ।
