काठमाडौं- तामाङ सेवा केन्द्र-नेपालको अध्यक्षमा तेकेबहादुर तामाङ निर्वाचित भएका छन् । बुधबार सुबिगाउँ, बौद्धस्थित संस्थाको कार्यालयमा सम्पन्न २२औं साधारणसभाले सर्वसम्मत नयाँ कार्यसमिति चयन गरेको हो । निवर्तमान कार्यसमितिमा उनी महासचिवको जिम्मेवारीमा थिए ।
नयाँ कार्यसमितिको प्रथम उपाध्यक्षमा फूर्वा डुम्जन तामाङ, द्वितीय उपाध्यक्षमा हरिबहादुर तामाङ, महासचिवमा मीठु तामाङ, सचिवमा दावा तामाङ र कोषाध्यक्षमा डोल्मा तामाङ निर्वाचित भए । यसैगरी सदस्यहरुमा पासाङकाजी तामाङ, धनबहादुर तामाङ, नारायणकुमार लामा, दोर्जी तामाङ, मिलनदेवी तामाङ, रामबहादुर तामाङ, धनकुमार तामाङ, सुने तामाङ र हिमाल तामाङ चयन भएका छन् ।
संस्थाको संरक्षक संरक्षक समिति संयोजकमा पाल्देन तामाङ तथा सदस्यमा कर्णबहादुर तामाङ, फूर्वा पाख्रिन तामाङ, निमा तामाङ, रत्नकुमार तामाङ, आङपासाङ तामाङ र ङिमादावा तामाङ चयन भएका छन् ।
नवनिर्वाचित कार्यसमितिलाई निवर्तमान अध्यक्ष अम्बर बम्जन तामाङले खादा ओढाएर बधाइ ज्ञापन गर्दै कार्यभार हस्तान्तरण गरेका थिए । नवनिर्वाचित अध्यक्ष तामाङले संस्थाको उद्देश्य प्राप्तिका लागि सबै सदस्यहरुलाई साथमा लिएर काम गर्ने प्रतिबद्धता जनाए ।
यसअघि साधारणसभाको बन्द सत्रमा निवर्तमान महासचिव तेकेबहादुर तामाङद्वारा प्रस्तुत संस्थाको आर्थिक वर्ष २०८९/८० को प्रगति प्रतिवेदन र कोषाध्यक्ष मीठु तामाङले प्रस्तुत गरेको आर्थिक प्रतिवेदन पारित गरिएको थियो ।
यसअघि साधारणसभाको उद्घाटन सत्रमा संस्थाका पूर्वअध्यक्ष कर्ण तामाङ, संरक्षक पाल्देन लामा, ङिमा तामाङलगायतले शुभकामना मन्तव्य राख्दै संस्था स्थापनादेखि गुम्बा निर्माणसम्ममा गर्नुपरेको संघर्ष सुनाएका थिए । नयाँ कार्यसमितिले संस्थालाई थप क्रियाशील बनाउने अपेक्षा उनीहरुले व्यक्त गरे ।
निवर्तमान अध्यक्ष बम्जनले आफ्नो १२ वर्षे नेतृत्वकालमा संस्थाको नियमित कार्यसँगै गुम्बा निर्माण सम्पन्न गरिएको जानकारी दिए । आर्थिक मन्दीको समयमा पनि संस्थाको लक्ष्यअनुसार गुम्बा सम्पन्न गर्नु महत्त्वपूर्ण उपलब्धि भएको उनको भनाइ छ । परिवर्तित अवस्था र सदस्यहरुको आवश्यकताअनुसार संस्थालाई अगाडि बढाउन नयाँ कार्यसमिति सक्षम हुने विश्वाससमेत उनले व्यक्त गरे ।
सोलुखुम्बु, खोटाङ, ओखलढुंगा, रामेछाप, दोलखालगायत जिल्लाबाट काठमाडौंमा आएर बसेका तामाङहरु आबद्ध यस संस्थाको सुबिगाउँमा आफ्नै भवन र गुम्बा रहेको छ । संस्थाले विभिन्न धार्मिक तथा सामाजिक कार्यहरु सञ्चालन गर्दै आएको निवर्तमान अध्यक्ष बम्जनले जानकारी दिए ।
![सिण्डिकेटधारीविरुद्ध व्यवसायीको आक्रोशः २५ व्यवसायीको तस्बिरमा जुत्ता प्रहार [भिडियो]](https://www.prabhabonline.com/uploads/posts/200X200/jutta-prahar-bairo-1789318338.jpg)