- नियमिततर्फ एक लाख ८९ हजार ७११ जना (५०.९२ प्रतिशत) मात्र उत्तीर्ण ।
- आंशिकतर्फ १८ हजार ३०, ग्रेडवृद्धितर्फ छ हजार १४० र पुरानो अंशिकतर्फ ६५० विद्यार्थी उत्तीर्ण ।
- अंग्रेजी विषयमा ननग्रेड (एनजी) ल्याउने विद्यार्थी धेरै
- ग्रेड वृद्धि परीक्षा आउँदो असोज ६ र ७ गते हुने
भक्तपुर– कक्षा १२ को परीक्षामा झण्डै आधा विद्यार्थी अनुत्तीर्ण भएका छन् । राष्ट्रिय परीक्षा बोर्डले मंगलबार सार्वजनिक गरेको नतिजामा यस्तो देखिएको हो ।
बोर्डले गत वैशाख २६ देखि जेठ ५ गतेसम्म लिएको कक्षा १२ को परीक्षामा सहभागी नियमिततर्फका एक लाख ८९ हजार ७११ विद्यार्थी उत्तीर्ण भएका छन् । यो परीक्षामा सहभागी संख्याको ५०.९२ प्रतिशत हो । यस वर्ष नियमिततर्फ तीन लाख ७२ हजार ६३७ विद्यार्थी सहभागी थिए ।
बोर्डका अध्यक्ष डा. महाश्रम शर्माका अनुसार आंशिकतर्फ १८ हजार ३०, ग्रेडवृद्धितर्फ छ हजार १४० र पुरानो अंशिकतर्फ ६५० जना उत्तीर्ण भएका छन् । देशभरका एक हजार ४५७ परीक्षा केन्द्रमा परीक्षा सञ्चालन भएका थिए । परीक्षामा नियमित, आंशिक, ग्रेडवृद्धि र पुरानो आंशिक विद्यार्थी सहभागी थिए ।
उक्त परीक्षामा नियमिततर्फ तीन लाख ७२ हजार ६३७, आंशिकतर्फ ६० हजार ९५९ र ग्रेडवृद्धितर्फ १४ हजार १३५ र पुरानोतर्फ एक हजार १०६ गरी चार लाख ४८ हजार ८३७ विद्यार्थी सहभागी भएकामा ५६ जनाको परीक्षा रद्द भएको बोर्डले जनाएको छ ।
आधा विद्यार्थी अनुत्तीर्ण भए पनि बोर्ड अध्यक्ष शर्माले यस वर्षको नतिजामा सुधार आएको दाबी गरेका छन् । ‘यसपटक गत वर्षभन्दा तीन प्रतिशत बिन्दुले नतिजामा सुधार आएकोे छ,’ शर्माले भने । उनका अनुसार यस वर्ष परीक्षामा नियमित र ग्रेडवृद्धि गरी चार लाख ६७ हजार ३८९ विद्यार्थी सहभागी भएकोमा एक लाख ८२ हजार परीक्षार्थी ननग्रेडेड अर्थात् अनुत्तीर्ण भएका छन् ।
गत वर्ष कक्षा १२ मा ४८ प्रतिशत विद्यार्थीले मात्र ग्रेडसिट प्राप्त गरेका थिए । नतिजा सुधार भए पनि शिक्षण सिकाइ अझै प्रभावकारी बनाउनुपर्ने बोर्डका अध्यक्ष शर्माले बताए ।
ननग्रेड धेरै अंग्रेजीमा
बोर्डले प्रकाशन गरेको कक्षा १२ को नतिजामा अंग्रेजी विषयमा ‘ननग्रेड’ (एनजी) ल्याउने विद्यार्थी धेरै रहेका छन् । बोर्डका सदस्यसचिव दुर्गा अर्यालका अनुसार यो विषयमा एक लाख नौ हजार ५२७ जना ननग्रेड छन् । दुई विषयसम्म नन ग्रेड ल्याएका एक लाख २३ हजार ३९६ जना छन् । एक विषयमा मात्र एनजी आउनेको संख्या भने ७९ हजार ५८४ जना रहेका छन् ।
जिपिए ३.६१ देखि ४ ल्याउने विद्यार्थीको संख्या छ हजार ९७६ छन् । त्यसैगरी, ३.२१ देखि ३.६० सम्म ल्याउने विद्यार्थीको संख्या ३८ हजार ९९९ छन् । त्यस्तै, २.८१ देखि ३.२० ल्याउने परीक्षार्थीको संख्या ६९ हजार १७४, जिपिए २.४१ देखि २.८० ल्याउने विद्यार्थीको संख्या ६३ हजार ७७ छन् भने २.०१ देखि २.४० जिपिए ल्याउने विद्यार्थीको संख्या ११ हजार ४३८ रहेको छ । यस्तै, १.६१ देखि २ सम्म जिपिए ल्याउने विद्यार्थीको संख्या ४७ रहेको छ ।
प्रत्येक विषयको सैद्धान्तिकतर्फ न्यूनतम ३५ प्रतिशत अंक प्राप्त गरेमात्रै विद्यार्थीले ग्रेडसिट प्राप्त गर्ने व्यवस्था गरिएको छ । तीमध्ये दुई विषयसम्म एनएजी (नन ग्रेडेड) आउनेले तत्कालै र बाँकी ५६ हजारले यसपालि ग्रेडवृद्धि परीक्षा दिएका थिए ।
लेटर ग्रेडिङ निर्देशिकामा संशोधन गरेर जुन विषयमा एनजी हुन्छ त्यही विषयमा मात्रै ग्रेडवृद्धि परीक्षा दिन पाउने व्यवस्था गरिएको छ । यसअघि दुईभन्दा बढी विषयमा एनजी आए अर्को वर्ष सबै विषयको परीक्षा दिनुपर्ने बाध्यता थियो ।
ग्रेड वृद्धि परीक्षा असोजमा
बोर्डले ग्रेड वृद्धि परीक्षा आगामी असोज ६ र ७ गते सञ्चालन गर्ने भएको छ । नतिजामा चित्त नबुझे १५ दिनभित्र प्रतिविषय ५०० रुपैयाँ तिरेर नतिजा पुनर्योग गराउनसक्ने बोर्डले जारी गरेको सूचनामा उल्लेख छ ।
