पोखरा – अन्तरराष्ट्रिय टेनिस फेडेरेशन (आइटिएफ) को विश्व वरियता जुनियर यु–१८ टेनिस प्रतियोगितामा नेपाली खेलाडीले पहिलोपटक उपाधि जित्न सफल भएका छन् । नेपालका प्रेरणा कोइरालाले यु–१८ सर्किट दुईको प्रतिष्पर्धामा महिला एकलतर्फ उपाधि जित्न सफल भइन् ।
कास्की जिल्ला टेनिस सङ्घको आयोजना तथा अन्तरराष्ट्रिय टेनिस महासङ्घको समन्वयमा पोखरा रङ्गशालास्थित टेनिस कोर्टमा माघ २७ गतेदेखि शुरु भएको प्रतियोगिताको शनिबार सम्पन्न अन्तिम खेलमा नेपालको राष्ट्रिय वरियतामा शीर्ष स्थानमा रहेकी कोइरालाले नेपालकै अभिलाषा विष्टलाई ६–२, ६–७ (४), ६–१ को सेटमा पराजित गर्दै महत्वपूर्ण ३० अङ्क जोड्न सफल भइन् ।
कोइरालाले भारतीय खेलाडी गर्जी पावर र विष्टले सिङ्गापुरका डेन्ना चोलाइ सेमिफाइनलमा पराजित गर्दै पहिलोपटक फाइनलमा स्थान पक्का गर्न सफल भएकी थिइन् । त्यसैगरी पुरुष एकलतर्फ भारतका अमन धहियाले उपाधि हासिल गरे । उनले भारतकै सिद्धार्थ जैसविनलाई ६–४ र ६–१ को सोझो सेटमा पराजित गरी ३० अङ्कका साथ उपाधि हात पारेका हुन् ।
त्यसैगरी महिला र पुरुष डवल्सतर्फको दुवै विधामा भारतीय खेलाडीहरूले उपाधि जित्न सफल भए । पुरुषतर्फ आदित्य रोय र जस्विन टिडानाको जोडीले अमनलइया र हिरक बोहोराको जोडीलाई ६–३ र ६–३ को समान सेटमा पराजित गरी उपाधि हासिल गरे । महिलातर्फ भारतका रिया अभेजा र एरिका कन्हागीको जोडीले उदय शाह र गारगी पावरको जोडी माथि २–६, ६–४ र १२–१० को सेटमा जित हासिल गरे ।
प्रतियोगितामा विभिन्न ११ देशका पुरुष ३२ र महिला ३२ गरी ६४ जना खेलाडीले प्रतिष्पर्धा गरेका थिए । विजेता खेलाडीहरूलाई नेपाल टेनिस सङ्घका अध्यक्ष ज्योति राणा, उपाध्यक्ष विनोद कायस्थ, प्रतियोगिता संयोजक एवं कास्की जिल्ला टेनिस सङ्घका सल्लाहकार सूर्य भुजेललगायतले पुरस्कार वितरण गरेका थिए ।
