काठमाडौं– सहिद स्मारक ‘ए’ डिभिजन लिगको सोमबार तीन खेलहरू भएका छन् । सोमबारको खेलमा मच्छिन्द्र फुटबल क्लब, एपीएफ क्लब र च्यासल युथ क्लब विजयी भएका छन् । जितसँगै मच्छिन्द्र फुटबल क्लब लिगको शीर्षस्थानमा पुगेको छ भने हारसँगै सरस्वती युवा क्लब ‘बी’ डिभिजनमा घटुवा भएको छ ।
सशस्त्र प्रहरीको हलचोकस्थित फुटबल मैदानमा सम्पन्न खेलमा सरस्वती युवा क्लब र च्यालस युथ क्बलसँग २–१ ले पराजित हुँदै ‘बी’ डिभिजनमा घटुवा भएको छ । त्यस्तै सातदोबाटोस्थित एन्फा कम्प्लेक्सको खेल मैदानमा भएको पहिलो खेलमा एपिएफले फ्रेन्ड्स क्लबलाई ५–२ गोल अन्तरले पराजित गरेको छ भने दोस्रो खेलमा एन्फा कम्प्लेक्स सातदोबाटोमा सोमबार साविक उपविजेता संकटा क्लबलाई ३–१ गोल अन्तरले पराजित गर्दै मछिन्द्र शीर्ष स्थानमा उक्लिएको छ ।
च्यासलको जितमा जापानी खेलाडीद्वय ताइगा नाकामुरा र हायातो वाकिनोले एक–एक गोल गरे । सरस्वतीका लागि भने काजिम बुसारीले एक गोल फर्काए । खेलको १८औँ मिनेटमा नाकामुराले गोल गर्दै च्यासललाई अग्रता दिलाएका थिए । त्यस्तै खेलको ६६औँ मिनेटमा वाकिनोले गोल गर्दै च्यासललाई २–० को अग्रता दिलाए । च्यासलसँगको हारसँगै सरस्वतीले १२ खेलमा ४ अङ्क जोड्यो । अब सरस्वतीले लिगको अन्तिम खेलमा सङ्कटा क्लबसँग खेल्नेछ । सरस्वतीलाई पराजित गरेसँगै च्यासल भने १५ अङ्क जोडेर लिगको नवौँ स्थानमा उक्लिएको छ ।
त्यस्तै एपिएफको जीतमा आशिष लामा र प्रवीन स्याङतेनले दुई÷दुई गोल गरे भने कप्तान टोपबहादुर विष्टले थप एक गोल गरे । पराजित फ्रेन्ड्स क्लबका लागि विश्व अधिकारी र फिलिपे डी सौजाले एक एक गोल गरे । खेलको १२ औँ मिनेटमा आशिषले गोल गर्दै एपिएफलाई शुरुआती अग्रता दिलाए । खेलको ४० औँ मिनेटमा आशिषले व्यक्तिगत दोस्रो गोल गर्दै एपिएफलाई २–० को अग्रता दिलाए । खेलको ६९ औँ मिनेटमा फिलिपेले गोल गर्दै फ्रेन्ड्सलाई २–१ को स्थितिमा ल्याए । खेलको ७१ औँ मिनेटमा प्रवीनले गोल गर्दै एपिएफलाई ३–१ को अग्रता दिलाए । ७६ औँ मिनेटमा फ्रेन्ड्सका विश्वले गोल गर्दा खेल ३–२ को स्थितिमा पुग्यो ।
त्यसपछि खेलको दोस्रो हाफको अतिरिक्त समयमा एपिएफले लगातार दुई गोल गर्यो । जसमा कप्तान टोपबहादुरले गोल गर्दै एपिएफलाई ४–२ को अग्रता दिलाए भने प्रवीनले व्यक्तिगत दोस्रो गोल गर्दै एपिएफलाई ५–२ को सानदार जीत दिलाए । जारी लिगमा यो एपिएफको दोस्रो जीत हो । जीतसँगै एपिएफले १२ खेलमा आठ अङ्क जोडेको छ । एपिएफ १३ औँ स्थानमा छ । पराजित फ्रेन्ड्स १२ खेलमा १४ अङ्क जोडेर लिगको नवौँ स्थानमा रहेको छ ।
त्यस्तै सोमबारको अन्तिम खेलमा जित हात पार्ने क्रममा मच्छिन्द्र फुटबल क्लबका लागि देवेन्द्र तामाङ, विशाल राई ’बी’ र दिपक राईले एक÷एक गोल गरे । संकटाका मेसोउकेले एक गोल फर्काए । खेलको ४४ औँ मिनेटमा देवेन्द्रले गोल गर्दै मछिन्द्रलाई सुरुवाती अग्रता दिलाएका थिए । उनले रञ्जिित धिमालको कर्नरमा हेड गोल गरेका थिए ।
खेलको ६४ औँ मिनेटमा विशालले फ्रिकिकबाट गोल गर्दै मछिन्द्रलाई २–० को अग्रता दिलाए । खेलको ८२ औँ मिनेटमा दिपकले गोल गर्दै मछिन्द्रलाई ३–० को अग्रता दिलाए । त्यसपछि खेलको ८९ औँ मिनेटमा संकटाका मेसोउकेले एक गोल फर्काएपनि मच्छिन्द्र ३–१ ले विजयी भयो ।
जितसँगै शीर्ष स्थानमा उक्लिएको मच्छिन्द्रले १२ खेलमा २८ अंक जोडको छ । र, मच्छिन्द्रले उपाधि होड कायम राखेको छ । मच्छिन्द्रले विभागीय टिम त्रिभुवन आर्मी क्लबलाई २ अंकले पछि पारेको छ । दोस्रो स्थानमा झरेको आर्मीको २६ अंक रहेको छ । तर, आर्मीले एक खेल कम खेलेको छ ।
-1745656903.jpeg)