काठमाडौं– सहिद स्मारक ‘ए’ डिभिजन लिगको मंगलबारको खेलमा त्रिभुवन आर्मी क्लब र सरस्वती क्लबले जित हात पारेका छन् । जावलाखेल युथ क्बललाई १—० को जित हात पारेको आर्मीले मंगलबारको जितसँगै लिगमा शीर्षस्थानमा पुगेको छ भने बलियो टिम हिमालयन शेर्पा क्लबविरुद्ध ४–३ को रोमाञ्चक जित हात पार्दै सरस्वती युथ क्वबले लिगमा पहिलो जित हात पार्दै स्पष्ट ३ अंक जोड्न सफल भएको छ ।
कप्तान भरत खवासको गोलमा आर्मी ए डिभिजन लिगको शीर्ष स्थानमा उक्लिएको हो । आर्मीको जितमा भरत खवासले ७४ औ मिनेटमा निर्णायक गोल गरे । उनले डिबक्सभित्र दुई डिफेन्डरलाई छलाउँदै भलीमा गोल गरेका थिए ।
खेल अवधिभर आर्मीले जावलाखेलमाथि दबाब बनाएपनि गोल निकाल्न भने सकेन । आर्मीमा भरतसँगै नवयुग श्रेष्ठले समेत गोलका धेरै अवसर गुमाएका थिए ।
खेलको १० औं मिनेटमा टंक बस्नेतको पासमा डिबक्सभित्र रहेका नवयुगले बल नियन्त्रण गर्न नसक्दा अग्रता लिने मौका गुमेको थियो । भरतको पासमा ४१ औं मिनेटमा भरतको पासमा नवयुगको प्रहार जावलाखलका गोलरक्षक अरुण ब्लोनले पन्च गरेर बाहिर फालेका थिए ।
दोस्रो हाफमा जावलाखेलले सुधारिएको खेल प्रर्दशन गर्यो । उसका रूपबहादुर लामाले डिबक्स बाहिरबाट हानेको प्रहार आर्मीका गोलरक्षक विकेश कुथुले उत्कृष्ट डाइभ गर्दै पन्च गरेर बाहिर फाले । विजयी गोल गरेका भरत खेलको ‘म्यान अफ दी म्याच’ घोषित भए । जितसँगै आर्मीले ९ खेलबाट २० अंक जोडेको छ । उसले दोस्रो स्थानको मछिन्द्रसँग एक अंकको अग्रता लिएको छ । जावलाखेल १२ अंक सहित लिगको आठौं स्थानमा यथावत छ ।
त्यसैगरी एन्फा कम्प्लेक्समा सम्पन्न पहिलो खेलमा सरस्वती युथ क्लबले हिमालयन शेर्पा क्लबलाई ४–३ गोल अन्तरले पराजित गर्दै लिगमा पहिलो जित निकालेको हो । सरस्वतीले लिगमा ९ खेलपछि पहिलो ३ अंक जोडेको हो । सरस्वतीको जितमा काजिम बुसारीले दुई गोल गरे । यस्तै विनोद केसी र मनिष थापाको नाममा एक एक गोल रह्यो ।
शेर्पाका आशिष गुरुङ, रबि थापा मगर र विजय श्रेष्ठले एक एक गोल फर्काए । रोमान्चक बनेको खेलको पाँचौं मिनेटमा बुसारीले गोल गर्दै सरस्वतीलाई अग्रता दिलाएका थिए । १० औं मिनेटमा आशिषले गोल गर्दै शेर्पालाई १–१ को बराबरीमा ल्याए । खेलको ३५ औं मिनेटमा विनोदले गोल गर्दै सरस्वतीलाई २–१ को अग्रता दिलाए । तर, ४५ औं मिनेटमा शेर्पाका विजयले गोल गर्दा पहिलो हाफ २–२ गोलको बराबरीमा सकिएको थियो ।
खेलको ८३ औं मिनेटमा बुसारीले व्यक्तिगत दोस्रो गोल गर्दै सरस्वतीलाई ३–२ को अग्रता दिलाए । ८८ औं मिनेटमा मनिषले गोल गर्दा सरस्वती ४–२ ले अघि रह्यो । त्यसपछि खेलको इन्जुरी समयमा शेर्पाका रबिले गोल गरेपनि सरस्वती ४–३ ले विजयी भयो । खेलमा सरस्वतीका बुसारी म्यान अफ दि म्याच चुनिए । जितसँगै सरस्वतीले ९ खेलमा ४ अंक जोडेको छ । सरस्वती लिगको पुछारमा यथावत रहेको छ । शेर्पा ९ खेलमा ७ अंक जोडेर १२ औं स्थानमा रहेको छ ।
बुधबार एन्फा कम्प्लेक्समा हुने खेलमा पुर्वच्याम्पियन मनाङ र संकटाबीचको एक मात्र प्रतिस्पर्धा हुनेछ ।
