ओखलढुंगा - सिद्धिचरण नगरपालिका वडा नं. ४, रुम्जाटारमा जारी रुम्जाटार गोल्डकपमा आज सोमबार ५ खेल भएका छन् । रुम्जाटार युनाईटेड क्लवको आयोजनामा सुरु भएको नायन ए साईड फुटबल प्रतियोगीताको तेस्रो दिन १० समूहविच ५ खेल भएको हो ।
सोमबार विहान ८ बजेबाट सुरु भएको प्रतियोगीताको पहिलो खेलमा रक्तमाला ज्ञानमाला क्लब र डाईनामिक युवा क्लब विच खेल भएको थियो । जसमा १–० को गोल अन्तरले हराउँदै रक्तमाला ज्ञानमाला क्लबले डाईनामिकलाई जितेको छ ।
विहान १० बजे भएको दोस्रो खेलमा प्रगतिशिल युवा क्लब वर्णालुलाई ३–० को गोल अन्तरले हराउँदै युनाईटेड रुम्जाटरले जित हात पारेको छ । दिउँसो १२ बजे भएको तेस्रो खेलमा जगरबोट एफसीलाई १–० गोल अन्तरले हराउँदै लिखुभुजी रामेछापले जितेको छ भने दिउँसो १ः३० मा भएको चौथो खेलमा साईनिङ स्टार अँधेरीलाई ४–० गोल अन्तरले हराउँदै एमपिसी रुम्जाटारले जितेको छ ।
अन्तिम खेलमा डाईमन्ट युथ क्लब मोलुङलाई ५–० को गोल अन्तरले हराउँदै एमएससी मानेभन्ज्याङले जितेको युनाईटेड क्लबका उपाध्यक्ष अभिनन्दन गुरुङले जानकारी दिए ।
मंगलबार विहान ८ बजेबाट बिवाईसी रुम्जाटार र युवा संघ खेल्दै छन् । त्यस्तै १० बजे अरिदमण गण ओखलढुंगा र बिवाईसी मोलुङ खेल्नेछ । भोली हुने दुई खेल सम्पन्न भएसँगै सहभागी २४ समूहअन्तर्गतको पहिलो खेल सम्पन्न भएर छनौट भएका १२ समूहविच प्रतिष्पर्धा सुरु हुने आयोजकले जनाएको छ ।
माघ २१ गतेबाट सुरु भएको प्रतियोगीतामा पहिलो र दोस्रो दिन गरी ५ ओटा समूहविच खेल भैसकेको छ । प्रतियोगीतामा ओखलढुंगा सहित रामेछाप, सोलुखम्बु र खोटाङ गरी २४ समूहको सहभागीता रहेको छ ।
विजेता समूहले १ लाख ५० हजार सहित ट्रफि, मेडल र प्रमाणपत्र प्राप्त गर्नेछन् ।उपविजेता समूहलाई १ लाख र सान्त्वना समूहलाई ५० हजारसहित मेडल र प्रमाणपत्र प्रदान गरिने भएकाे छ ।
प्रकाशित मिति: सोमबार, माघ २३, २०७९ २०:०५
