काठमाडौं – सहिद स्मारक ‘ए’ डिभिजन लिग फुटबलको शनिबार सम्पन्न दुई खेलमध्ये एक खेल नतिजाबिहीन र एक खेल हार–जितसहित सम्पन्न भएको छ । राजधानीको त्रिपुरेश्वरस्थित दशरथ रंगशालामा सम्पन्न पहिलो खेलमा मच्छिन्द्र फुटबल क्लबले जित हात पार्दै लिगको शीर्षस्थानमा कब्जा जमाएको छ ।
मच्छिन्द्रले जावलाखेल युथ क्लबलाई १–० गोल अन्तरले पराजित गर्दै शीर्ष स्थानमा कब्जा जमाएको हो । मछिन्द्रको साँघुरो जितमा विशाल राईले निर्णायक गोल गरे । खेलको ३१ औं मिनेटमा विशालले गोल गर्दै मछिन्द्रलाई महत्वपूर्ण ३ अंक दिलाएका हुन् ।
जावलाखेलविरुद्ध बल पोजिसनमा पकड जमाएपनि मछिन्द्रले थप गोल गर्न सकेन । मछिन्द्रले पाएको थप अवसरलाई गोलमा परिणत गर्न सकेन । पहिलो हाफको ४० औं मिनेटमा मछिन्द्रका रेजिन सुब्बा अग्रता दोब्बर बनाउन चुके । डिबक्स भित्रबाट उनको प्रहार पोस्ट नजिकैबाट बाहिरिएको थियो । यस्तै खेलको ८७ औं मिनेटमा कर्नरमा आएको बललाई सुजल श्रेष्ठले हेडबाट पोस्टको दिशा दिन सकेनन् ।
जावलाखेलले पनि केहि गोलको अवसर बनाएको थियो । २४ औं मिनेटमा हरि कठायतको सशक्त प्रहार मछिन्द्रका गोलरक्षक विशाल श्रेष्ठको खुट्टामा लाग्दै बाहिरिएको थियो । जितसँगै मछिन्द्रले ६ खेलमा १३ अंक जोडेको छ । र, मछिन्द्रले अपराजित यात्रा कायम राखेको छ । जितपछि मछिन्द्र त्रिभुवन आर्मी क्लबलाई १ अंकले पछि पार्दै शीर्ष स्थानमा उक्लिएको हो । जावलाखेलको ६ खेलमा ९ अंक रहेको छ । जावलाखेल पाँचौं स्थानमा रहेको छ ।
यसैबीच दोस्रो खेलमा साविक विजेता मनाङ मस्र्याङ्दी क्लब हिमालयन शेर्पा क्लबसँग बराबरीमा रोकिएको छ । रोमान्चक बनेको खेलमा पाएको अवसरमा गोल गर्न नसक्दा दुवै टोलीले एक–एक अंक बाँडेका हुन् । शेर्पासँगको बराबरीसँगै मनाङले लिगको शीर्ष स्थानमा उक्लने मौका गुमाएको छ । मनाङले ६ खेलमा १२ अंक जोडेको छ । मनाङ तेस्रो स्थानमा रहेको छ । लिगमा मनाङको यो तेस्रो बराबरी हो ।
मनाङलाई बराबरीमा रोकेको शेर्पाले ६ खेलमा ४ अंक जोडेको छ । शेर्पा तालिकाको ११ औं स्थानमा रहेको छ । खेलको १२ औं मिनेटमा मनाङका जीवन गुरुङ शेर्पाका गोलकिपर किशोर गिरीलाई बिट गरेपनि गोल गर्न सकेनन् । उनको बल शेर्पाका डिफेन्डर निरज बस्नेतले क्लियर गरे । खेलको २१ औं मिनेटमा शेर्पाका विनोद गुरुङ खाली पोस्टमा गोल गर्न चुके । मनाङका गोलकिपर दिप कार्की डिबक्स बाहिर आएको अवस्थाले विनोदले डिबक्स बाहिरबाट पोस्ट भन्दा बाहिर प्रहार गरे । २३ औं मिनेटमा कमल श्रेष्ठको फ्रिकिकमा विमल रानाको हेड क्रस बार माथिबाट बाहिरियो । लगत्तै २५ औं मिनेटमा फेमि जोसुवा गोल गर्न चुके । विमलले डिबक्स भित्र उपलब्ध गराएको बलमा जोसुवाको वन टच प्रहार शेर्पाका किपर किशोर गिरीको खुट्टामा लाग्दै फर्किएको थियो ।
खेलको ७० औं मिनेटमा भिदाल लुइसको डिबक्स भित्रको प्रहार शेर्पाका किपर किशोर गिरिले उत्कृष्ट बचाऊ गरे । ७२ औं मिनेटमा शेर्पाका स्टेफेन समिरलाई डिबक्सको ठिक बाहिर फउल गरेपछि मनाङका सुरज विश्वकर्माले रातो कार्ड पाएका थिए ।
यस्तै खेलको ८३ औं मिनेटमा मनाङका विमल रानाले पाएको अवसर सदुपयोग गर्न । काउन्टरमा उनको फितलो प्रहार किशोर गिरीले सहजै बचाए । ८७ औं मिनेटमा शेर्पाका सुरज हमाल गोल गर्न चुके । काउन्टरमा आएको बलमा डिबक्स भित्रबाट उनले प्रहार गरेको बल मनाङका किपर दिप कार्कीले सहजै बचाए । खेलको इन्जुरी समयमा मनाङका विमल पुनः गोल गर्न चुके । डिबक्स भित्रबाट उनले बाहिर प्रहार गरे । इन्जुरी समयमै मनाङका किपर दिप कार्की अघि बढेको अवस्थामा शेर्पाका सुरजको चिप बल पोस्टको नजिकबाट बाहिरिएको थियो । खेलमा म्यान अफ दि म्याच शेर्पाका उर्लिच चुनिए ।
