काठमाडौं- नेपाली अलराउन्डर दिपेन्द्र सिंह ऐरी टी–ट्वान्टी अन्तर्राष्ट्रिय क्रिकेटको अलराउन्डर वरीयतामा शीर्ष दश भित्र पर्न सफल भएका छन् । अन्तर्राष्ट्रिय क्रिकेट परिषद (आईसीसी) ले सार्वजनिक गरेको टी–ट्वान्टी अन्तर्राष्ट्रिय क्रिकेटको अलराउन्डरको वरीयतामा दिपेन्द्रले शीर्ष दशमा स्थान पाएका हुन् ।
दिपेन्द्रले गत महिना घरेलु मैदानमा भएको त्रिकोणात्मक टी–ट्वान्टी सिरिजमा उत्कृष्ट अलराउन्ड प्रदर्शन गर्दै म्यान अफ द सिरिज घोषित भएका थिए । उनले मलेसिया र पपुवा न्युगिनी (पीएनजी) विरुद्धको सिरिजमा २ अर्धशतक र १ शतक प्रहार गरेका थिए ।
यस्तै दिपेन्द्र टी–ट्वान्टी ब्याटिङ वरीयतामा ३८ औं स्थानमा रहेका छन् । ब्याटिङ वरीयतामा दिप्रद्र भन्दाअघि ओपनर कुशल भुर्तेल ३६ औं स्थानमा रहेका छन् । आसिफ शेख ९९ औं स्थानमा छन् । बलिङ वरीयतामा नेपालका सन्दीप लामिछाने ३८ औं र अविनास बोहरा ८६ औं स्थानमा रहेका छन् ।
