काठमाडौं – सहिद स्मारक ‘ए’ डिभिजन लिग फुटबलमा दोस्रो स्थानको मनाङ मस्र्याङ्दी क्लब पराजित भएको छ । बिहीबार भएको खेलमा मनाङ विभागीय टोली एपिएफ क्लबसँग ३–१ गोल अन्तरले पराजित भएको हो ।
एपिएफलाई जित दिलाउन आशिष लामा, मनि कुमार लामा र नविन लामाले एक एक गोल गरे । मनाङका अन्जन विष्टले एक गोल फर्काए । त्रिपुरेश्वरस्थित दशरथ रंगशालामा सुरुआती एक गोलको अग्रता उल्टाएर एपिएफले जित निकालेको हो ।
खेलको ३६ औं मिनेटमा कप्तान अन्जनले गोल गर्दै मनाङलाई सुरुआती अग्रता दिलाएका थिए । गोलकिपर विशाल सुनारको लामो पासमा एपिएफका गोलकिपर युया कुरियामा अघि बढेको अवस्थामा अन्जनले हेडर मार्फत गोल गरे । तर, खेलको ४० औं मिनेटमा आशिषले गोल गर्दै एपिएफलाई १–१ को बराबरीमा ल्याए ।
कप्तान नविन लामाको पासमा मनाङका डिफेन्डर नरेन्द्र चौधरीले क्लियर गर्न नसकेको बल अघि बढाउदै आशिषले सहजै गोल गरे ।खेलको ८२ औं मिनेटमा मनिले गोल गर्दै एपिएफलाई २–१ को अग्रता दिलाए । कप्तान नविन लामाको पासमा उनले सहजै गोल गरेका हुन् ।
त्यसपछि खेलको ८७ औं मिनेटमा कप्तान नविनले गोल गर्दै एपिएफलाई ३–१ को जित दिलाए ।आशिष लामाले पेनाल्टी क्षेत्र बाहिरबाट प्रहार गरेको बल मनाङका गोलकिपर विशालले रोकेपछि आएको रिबाउन्डमा उनले गोल गरेका हुन् । त्यसबाहेक दुबै टोलीले पाएको मौकामा चुकेका थिए ।
खेलको चौंथो मिनेटमा एपिएफका आशिष लामाले पेनाल्टी क्षेत्रको ठिक भित्रबाट प्रहार गरेको बल पहिलो बारको नजिकबाट बाहिरिएको थियो ।खेलको ३४ औं मिनेटमा नितिन थापाको पासमा एडिलाजा सोमिडेको सशक्त प्रहार एपिएफका गोलकिपर किरियामाले मुश्किलले बचाए ।
३९ औं मिनेटमा मनाङका विमल राना गोल गर्न चुके । कप्तान अन्जनको क्रसमा अनमार्क रहेका विमलको फ्रि हेडर सिधै एपिएफका गोलकिपरको हातमा गएको थियो । खेलको ७४ औं मिनेटमा मनाङका दिपक राईको प्रहार पोस्टको फ्रेममा पर्न सकेन । यस जितसँगै एपिएफलाई रेलिगेसनको डर सकिएको छ ।
एपिएफले ११ खेलमा १४ अंक जोडेको छ । एपिएफ आठौं स्थानमा उक्लिएको छ । मनाङले ११ खेलमा २० अंक जोडेको छ । मनाङ दोस्रो स्थानमा कायम रहेको छ ।
-1745656903.jpeg)