काठमाडौं – सहिद स्मारक लिग ‘ए’ डिभिजन फुटबलको शनिबार भएको खेलमा मछिन्द्र युवा क्लब र एनआरटी क्लबले जित हात पारेका छन् । साविक विजेता मछिन्द्र फुटबल क्लब हिमालयन शेर्पा क्लबलाई ३–० गोल अन्तरले पराजित गर्दै मछिन्द्र शीर्ष स्थानमा उक्लिएको छ भने सातदोबाटो युथ क्लबलाई १–० गोल अन्तरले पराजित गर्दै एनआरटीले पहिलो जित निकालेको छ ।
त्रिपुरेश्वरस्थित दशरथ रंगशालामा मछिन्द्रलाई जित दिलाउन सुनिल बल, नुर्लान नोभ्रुजोभ र विमल घर्ति मगरले एक एक गोल गरे । सुरुआतबाटै आक्रामक खेल पस्किएको मछिन्द्रका नुर्लान नोभ्रुजोभले ११ औँ मिनेटमा प्रहार गरेको बल क्रस बारमा लागेर बाहिरिदा अग्रता बनाउन चुकेको थियो । डिफेन्डर रंजित धिमालको लामो पासमा नुर्लानले पेनाल्टी एरियाबाट प्रहार गरेका थिए । २२ औँ मिनेटमा पेनाल्टी एरियाको ठिक बाहिरबाट मछिन्द्रका सुनिल बलको फ्रि–किक हिमालयनका गोलकिपर दीप कार्कीले पन्च गर्दै बाहिर पठाए । तर, खेलको २९ औँ मिनेटमा सुनिल बलले गोल गर्दै मछिन्द्रलाई सुरुआती अग्रता दिलाए । सेट पिसमा गोल निकाल्ने क्रममा सुनिलले नुरेन करिमको फ्रि–किकमा हिमालयनका गोलकिपर दीप कार्की अघि बढेको अवस्थामा रन बनाएर गोल गरेका हुन् ।
खेलको ३३ औँ मिनेटमा मनिष डाँगीको क्रसमा मछिन्द्रका सुनिल ट्याप इन गर्न असफल भए । ४७ औँ मिनेटमा हिमालयनका सुरेश कुमालको प्रहार मछिन्द्रका गोलकिपर विशाल श्रेष्ठले मुश्किलले जोगाएपछि हिमालयन बराबरी गर्न चुकेको थियो । खेलको ६८ औँ मिनेटमा नुर्लानले गोल गर्दै मछिन्द्रलाई २–० को अग्रता दिलाए । विशाल राईको कर्नरमा हिमालयनका सुरेश कुमाललाई लाग्दै आएको बलमा सिक्स यार्ड बक्समा रहेका नुर्लानले पोस्टको जाली चुमाए ।
त्यसपछि खेलको इन्जुरी समयमा विमलले गोल गर्दै मछिन्द्रलाई ३–० को जित दिलाए । दोस्रो हाफमा मैदान प्रवेश गरेका विमलले आन्द्रेस नियाको पासलाई सदुपयोग गरे । यस जितसँगै मछिन्द्रले ४ खेलमा १० अंक जोडेको छ । मछिन्द्र मनाङ मर्स्याङ्दी क्लबलाई गोल अन्तरमा पछि पार्दै शीर्ष स्थानमा उक्लिएको हो । हिमालयन शेर्पाले ४ खेलमा २ अंक जोडेको छ । हिमालयन १२ औँ स्थानमा रहेको छ । खेलमा मछिन्द्रका छिरिङ गुरुङ म्यान अफ दि म्याच चुनिए । हिमालयनका उमेश राईले इमर्जिङ प्लेयर प्लेयरको अवार्ड जिते । त्यसअघि पहिलो खेलमा एनआरटीको पहिलो जितमा स्टेफेन समिरले निर्णायक गोल गरेका थिए । तर, एनआरटीले जित निकाल्न दोस्रो हाफसम्म कुर्नु परेको थियो ।
रोमान्चक खेलको पहिलो हाफमा सातदोबाटोले एकतर्फी खेल पस्किएको थियो । तर, गोल गर्न चुक्यो । सातदोबाटोका कप्तान मान बहादुर तामाङको क्रसमा निरज चौधरीको १३ औँ मिनेटको हेडर एनआरटीका गोलरक्षक अजित प्रजापतिले बचाए । खेलको ३५ औँ मिनेटमा सातदोबाटोका आकाश बुढा मगरले पेनाल्टी क्षेत्रको ठिक बाहिरबाट प्रहार गरेको बल फ्रेममा पर्न सकेन । खेलको ३९ औँ मिनेटमा एनआरटीका सरोज तामाङले पेनाल्टी क्षेत्रभित्रबाट प्रहार गरेको बल सातदोबाटोका डिफेन्डर पिटर सेगुनलाई लाग्दै फर्किएको थियो ।
खेलको ४४ औँ मिनेटमा एनआरटीका मेसुके ओलुमोउको प्रहार सातदोबाटोका गोलकिपर अविशेक बराल बिट भईसकेको अवस्थामा कप्तान मान बहादुर तामाङले गोललाइन नजिकबाट क्लियर गरे ।
पहिलो हाफको इन्जुरी समयको तेस्रो मिनेटमा एनआरटीका स्टेफेन समिरको हेडरले पोस्टको दिशा लिन सकेन । दोस्रो हाफको सुरुवातमै एनआरटि गोल निकाल्यो । ४६ औँ मिनेटमा स्टेफेन समिरले गोल गर्दै एनआरटीलाई अग्रता दिलाए । जुन गोल निर्णायक बन्यो । सातदोबाटोका करण रावतको ’मिस पास’ मा मेसुकेले बल नियन्त्रणमा लिदै उपलब्ध गराएको बलमा समिरले सहजै गोल गरेका हुन् । खेलको ५९ औँ मिनेटमा स्टेफेन समिरको प्रहार सातदोबाटोका गोलरक्षक अविशेक बरालले मुश्किलले जोगाए ।
एनआरटीका दर्शन गुरुङ ६५ औँ मिनेटमा गोलरक्षकसँगको वान भर्सेस वानको स्थितिमा गोल गर्न सकेन । पेनाल्टी क्षेत्र भित्रबाट उनको प्रहार सातदोबाटोका गोलरक्षक अविशेकले बचाए । त्यस्तै खेलको ६७ औँ मिनेटमा एनआरटीका दिपेश घलेको प्रहार क्रसबार भन्दा केहि माथिबाट बाहिरिएको थियो । खेलको ८१ औँ मिनेटमा सातदोबाटोले बराबरी गर्ने मौका गुमायो । पेनाल्टी क्षेत्रभित्रबाट आकाश बुढा मगरको फितलो प्रहार एनआरटीका गोलरक्षक अजित प्रजापतिले सहजै रोके ।
यस जितसँगै एनआरटीले ४ खेलमा ५ अंक जोडेको छ । एनआरटी सातौं स्थानमा उक्लिएको छ । सातदोबाटोले ४ खेलमा ७ अंक जोडेको छ । सातदोबाटो तेस्रो स्थानमा रहेको छ । सातदोबाटोको यो पहिलो हार हो । यस अघि सातदोबाटोले दुई जित र एक बराबरी खेलेको थियो । एनआरटीसँगको हारसँगै सातदोबाटोले शीर्ष स्थानमा उक्लने अवसर गुमाएको छ । खेलमा एनआरटीका बिक्रम धिमाल म्यान अफ दि म्याच चुनिए । यस्तै इमर्जिङ प्लेयरको अवार्ड सातदोबाटोका गोलरक्षक अविशेक बरालले हात पारे ।
-1752335779.jpg)
