काठमाडौं – अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले एसियाली फुटबल महासंघ (एएफसी) का अध्यक्ष सलमान बिन इब्राहिम अल खलिफासँग भेटवार्ता गरेका छन् । अध्यक्ष शेर्पाले सोमबार बहराइनमा एएफसी अध्यक्ष सलमानसँग भेटवार्ता गरेको एन्फाले जनाएको छ । भेटमा फुटबलका विभिन्न विषयमा छलफल भएको एन्फाले जनाएको छ । अध्यक्ष शेर्पाले नेपालमा फुटबलको विकासमा निरन्तर सहयोग गरेकोमा एएफसीलाई धन्यवाद दिएका थिए ।
अध्यक्ष शेर्पाले सलमानलाई नेपाल भ्रमणको निम्तो समेत दिएका थिए । नेपाल भ्रमण गर्न दिएको निमन्त्रणाप्रति सलमान सकारात्मक भएको एन्फाले जनाएको छ । यस्तै भेटमा अध्यक्ष शेर्पाले एएफसीको कार्यकारी समितिको बैठक नेपालमा आयोजना गर्ने प्रस्ताव पनि राखेका थिए । भेटवार्ताको क्रममा अध्यक्ष शेर्पाले सलमानलाई नेपाली टोलीको जर्सी उपहार दिएका थिए । बैठकमा एएफसीका महासचिव डाटो विन्डसर जोनको समेत उपस्थिति रहेको थियो ।
