ललितपुर – धनगढी उप महानगरपालिका उपमेयर कप राष्ट्रिय महिला लिग छनोट प्रतियोगिताको सेमिफाइनलमा प्रवेश गरेको छ । सातदोबाटोस्थित एन्फा कम्प्लेक्समा मंगलबार भएको खेलमा धनगढीले बाँसगढी नगरपालिका, बर्दियालाई १२–१ गोल अन्तरले पराजित गर्दै अन्तिम चारमा प्रवेश गरेको हो । धनगढीको जितमा चन्द्रा भण्डारी एक्लैले पाँच गोल गरिन् ।
त्यसैगरी, रेखा पौडेलले चार गोल गर्दा सरस्वती रोकाया, सुरक्षा कुमारी सिंह र विर्सना चौधरीले एक–एक गोल गरे । बाँसगढीका लागि एकमात्र गोल अमिशा कार्कीले गरिन् । धनगढीकी चन्द्रा भण्डारी प्लेयर अफ द म्याच घोषित भईन । धनगढीले सेमिफाइनलमा रोङ गाँउपालिका, इलाम तथा गौरीगंगा नगरपालिका, कैलालीबीचको विजेतासँग भिड्ने छ । रोङ र गौरीगंगाबीचको खेल बुधबार हुनेछ ।
सोमबार नै गोदावरी नगरपालिका, कैलालीले कनकाई नगरपालिका, झापाविरुद्ध खेल्नेछ । कुल १० टोली सहभागि नकाउट चरणको बिजेता र उपविजेताले उपमेयर महिला लिगमा सहभागिताको अवसर पाउने छ । छनौट चरणको प्रतियोगिताको विजेताले ५ लाख नगद पुरस्कार पाउने छन् । यस्तै उपविजेताले ३ लाख र फेयर प्ले टिमले ५० हजार पाउने छन् ।
