काठमाडौं – एभरेष्ट प्रिमियर लिग (ईपीएल) टी–ट्वान्टी क्रिकेट अन्तर्गत साविक विजेता ललितपुर प्याट्रीयट्स र भैरहवा ग्लाडीयटर्सबीचको खेल बराबरीमा सकिएको छ । त्रिभुवन विश्वविद्यालयको कीर्तिपुरस्थित क्रिकेट मैदानमा बिहीबार ललितपुर र भैरहवाबीचको रोमान्चक खेल ‘टाइ’ भएको हो । त्यस्तै बुधबार नै भएको पहिलो खेलमा चितवन टाइगर्सले काठमाडौँ किङ्स–११ लाई तीन विकेटले पराजित गरेको थियो ।
भैरहवा र ललितपुरबीचको खेलमा पहिले ब्याटिङ गर्दै ललितपुरले १ सय ७८ रनको लक्ष्य दिएको थियो । जवाफी ब्याटिङ गरेको भैरहवाले २० ओभरमा ५ विकेट गुमाएर १ सय ७७ रन बनाएपछि खेल बराबरीमा सकिएको हो । स्कोर बराबर भएपनि खराब प्रकाशको कारण सुपर ओभर भएन र दुबै टोलीलाई एक–एक अंक दिईएको हो । रोमाञ्चक खेलमा भैरहवालाई अन्तिम ओभरमा जितका लागि १८ रन आवश्यक थियो । ललितपुरका राशिद खान बलिङमा थिए । तर, उनले अन्तिम ओभरमा १ विकेट लिदै १७ रन खर्चिएपछि ललितपुर जित निकाल्न बन्चित भएको हो । अन्तिम एक बलमा ७ रन चाहिएको बेला भैरहवाका कप्तान शरद भेषवाकरले छक्का प्रहार गर्दै स्कोर बराबरी गरेका थिए ।
भैरहवाका लागि उपुल थरंगाले अविजित रहदै ६७ रनको अर्धशतकीय इनिङ्स खेले । उनले ४४ बलमा ६ चौका र ४ छक्का प्रहार गरे । शरद ६ रनमा अविजित रहे । यस्तै कुशल मल्ल ३५ रन तथा आरिफ शेखले २८ रनमा आउट भए । तमिम इकबालले १४ रन बनाए । प्रदिप ऐरी र रोहित पौडेल समान २÷२ रनमा आउट भए । ललितपुरका राशिद खानले ३ तथा रिजन ढकालले २ विकेट लिए ।
यस अघि टस हारेर पहिले ब्याटिङ गरेको ललितपुरले २० ओभरमा ७ विकेट गुमाएर १ सय ७७ रन बनाएको थियो । ललितपुरका लागि सन्दुन विराकोड्डीले ५८ रनको अर्धशतकीय इनिङ्स खेले । यस्तै अज्मतुल्लाह ओमारजाईले ४२ रन बनाए ।
सन्दीप जोराले ३८ रन जोड्दा ओशाडा फर्नान्डोले २० रन बनाए । त्यस्तै योगेन्द्र सिंह कार्कीले ७ रन जोड्दा कप्तान कुशल भुर्तेल २ रनमा आउट भए । पवन सर्राफले १ रनमा आउट हुँदा नारायण जोशी सुन्य रनमा अविजित रहे ।
भैरहवाका अविनास बोहराले २ विकेट लिए । धम्मिका प्रसाद,कृष्ण कार्की र आरिफ शेखले १-१ विकेट लिए । ललितपुरविरुद्ध एक अंक पाएपछि भैरहवा शीर्ष स्थानमा उक्लिएको छ । भैरहवाले ३ खेलमा ४ अंक जोडेको छ । भैरहवाले बुधबार विराटनगर वारियर्सलाई हराएको थियो । त्यसअघि भैरहवाले पोखरा राइनोजसँग अंक बाडेको थियो । ललितपुरले भने पहिलो एक अंक पाएको छ । ललितपुर ३ खेलमा १ अंक जोडेर पाचौं स्थानमा रहेको छ । पहिलो खेलमा काठमाडौं किङ्स–११सँग पराजित ललितपुर दोस्रो खेलमा पोखरा राइनोजसँग पराजित भएको थियो । त्यस्तै पहिलो खेलमा चितवन टाइगर्सले काठमाडौँ किङ्स–११ लाई तीन विकेटले पराजित गरेको थियो । काठमाडौँले दिएको १४२ रनको लक्ष्य पछ्याउने क्रममा चितवनले १८ दशमलव ४ ओभरमा ७ विकेट गुमाउँदै लक्ष्य पूरा गर्यो ।
चितवनको जितमा राजेश पुलामीले अविजित रहदै सर्वाधिक २६ रन बनाए । कमलसिंह ऐरी २३ रनमा अविजित रहे । यस्तै दिलीप नाथले २३, करिम जनतले २१, मोहमद साहजदले २१, भीम सार्कीले ६, सेकुगे प्रसन्नले ५ तथा इशान पाण्डेले ४ रन बनाए । कप्तान सोमपाल कामी भने शून्य रनमा आउट भए । काठमाडौँका जीतेन्द्र मुखिया र रायन बर्लले २-२ विकेट लिए भने जनक प्रकाश, सन्दीप लामिछाने र गुलशन झाले १-१ विकेट लिए । त्यसअघि टस हारेर पहिले ब्याटिङ गरेको काठमाडौँले निर्धारित २० ओभरमा ८ विकेट गुमाएर १४१ रन बनाएको थियो । काठमाडौँका लागि सुवास खकुरेलले सर्वाधिक ३५ रन बनाउद राजु रिजालले २८ रन जोडे ।
त्यसैगरी जनक प्रकाशले २६, रहमानउल्लाह गुर्बाजले ५, अमित श्रेष्ठले ६, अमर रौटेला ५, गुलशन झाले ४ रन जोड्दा रायन बुर्ल शून्य रनमा आउट भए । कप्तान सन्दीप लामिछाने ७ रनमा अविजित रहे । चितवनका सागर ढकालले ४ विकेट लिए भने करिम जनतले दुई विकेट लिए । कमल ऐरी र सेकुगे प्रसन्नले एक एक विकेट लिए । चितवनले २ खेलमा ४ अङ्क जोडेको छ । काठमाडौँको २ खेलमा २ अङ्क छ । काठमाडौँले पहिलो खेलमा ललितपुर प्याट्रीयट्सलाई हराएको थियो ।
-1745656903.jpeg)