काठमाडौं – दोस्रो अन्तराष्ट्रिय मैत्रीपूर्ण फुटबलमा भारतले नेपाललाई हराएको छ । दशरथ रंगशालामा आइतबार भएको दोस्रो मैत्रीपूर्णमा भारतले नेपाललाई २–१ गोल अन्तरले हराएको हो ।
भारतको जितमा कप्तान सुनिल क्षेत्री नायक रहे । उनले एक गोल गर्नुका साथै थप एक गोलको अवसर सिर्जना गरे । नेपालका तेज तामाङले एक गोल फर्काए ।
खेलको ६२ औं मिनेटमा फारुख हाजी चौधरीको गोलमा भारतले अग्रता बनाएको थियो । भारतीय डिफेन्डर चिन्गलेनसाना सिंह कोन्शामको क्रसमा सुनिल क्षेत्रीले हेडमार्फत डिबक्सभित्र उपलब्ध गराएको बलमा चौधरीले गोल गरेका थिए । खेलको ८० औं मिनेटमा कप्तान क्षेत्रीले गोल गर्दै भारतको अग्रता दोब्बर बनाउने काम गरे । गोलका लागि हतारिएको नेपाली टिमविरुद्ध काउन्टरमा क्षेत्रीले भारतका लागि दोस्रो गोल गरेका थिए ।
खेल सकिन ५ मिनेट अघि तेजले नेपालका तर्फबाट एक गोल फर्काए । राष्ट्रिय फुटबल टिमबाट तेजले पहिलो अन्तराष्ट्रिय गोल गर्न सफल भए । झण्डै २० यार्ड टाढाबाट तेजको शक्तिशाली प्रहारले जाली चुमेको थियो । साफ च्याम्पियनसिपको तयारीमा रहेको नेपालले भारतलाई मैत्रीपूर्ण फुटबल खेलका लागि काठमाडौंमा आतिथ्यता प्रदान गरेको थियो । भारतविरुद्ध दुई मैत्रीपूर्ण फुटबल खेलेर साफको अन्तिम तयारीमा जुट्ने नेपालको योजना छ । बिहिबार पहिलो मैत्रीपूर्ण खेलमा नेपाल र भारतले १–१ गोलको बराबरी खेलेको थियो ।
तेज तामाङ म्यान अफ दि म्याच
भारतविरुद्धको दोस्रो मैत्रीपूर्ण फुटबल खेलमा नेपालको तर्फबाट तेज तामाङ म्यान अफ दी म्याच चुनिएका छन् । भारतसँग २–१ ले पराजित बनेको खेलमा नेपालको तर्फबाट तेजले गोल गरेका थिए । भारत २–० ले अघि बढेको अवस्थामा तेजकै गोलमा नेपाल खेलमा फर्कने कोशिश गरेको थियो । खेल सकिन ५ मिनेट अघि तेजले झण्डै २० यार्ड टाढाबाट गोल गरेका थिए । तेज पहिलो खेलमा समेत नेपालको तर्फबाट म्यान अफ दी म्याच चुनिएका थिए । प्रतियोगिताको प्लेयर अफ दी सिरिज भने भारतका रहिम अली घोषित बने ।
विशालको डेब्यू
कीर्तिमानी गोलकिपर एवं कप्तान किरण चेम्जोङको ठाउँमा मैदान प्रवेश गर्दै गोलकिपर विशाल श्रेष्ठले राष्ट्रिय टिममा डेब्यु गरेका छन् । आइतबार भएको दोस्रो मैत्रीपूर्ण खेल अन्तर्गत दोस्रो हाफमा मैदान प्रवेश गर्दै विशालले डेब्यु गरेका हुन् । यस्तै राजन गुरुङले समेत डेब्यु गरेका छन् ।
किरणको कीर्तिमान
राष्ट्रिय फुटबल टिमका कप्तान तथा गोलरक्षक किरण चेम्जोङ नेपालका लागि सर्वाधिक खेल खेल्ने कीर्तिमान बनाएका छन् । भारतविरुद्धको दोस्रो मैत्रीपूर्ण अन्तर्राष्ट्रिय खेलसँगै किरणले यो उपलब्धी हात पारेका हुन् । किरण सुरुवाती–११ मा परेका छन् । किरणको यो नेपालका लागि ७४ औं खेल हो । किरणले पूर्व कप्तान विराज महर्जनको कीर्तिमान भङ्ग गरेका हुन् । विराजले नेपालका लागि ७३ खेल खेलेका छन् । किरणले बिहीबार भारतविरुद्धको पहिलो मैत्रीपूर्णमा विराजको कीर्तिमान बराबरी गरेका थिए ।
-1752335779.jpg)
