काठमाडौं- बागमती प्रदेशको मुख्यमन्त्रीमा नेकपा एमालेका किरण थापा मगर नियुक्त भएका छन्।
बागमती प्रदेशप्रमुख दीपकप्रसाद देवकोटाले आज नेपालको संविधानको धारा, १६८ को उपधारा २ अनुसार थापा मगरलाई मुख्यमन्त्रीमा नियुक्त गरेका हुन्।
नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा)को समर्थनमा बुधबार थापा मगरलाई मुख्यमन्त्री बनाउन प्रदेशप्रमुखसमक्ष प्रस्ताव पेस गरिएको थियो। राप्रपा केन्द्रले भने मुख्यमन्त्रीका लागि आफ्नो दलको समर्थन नरहेको जनाएको थियो।
नवनियुक्त मुख्यमन्त्री थापा मगरले आजै प्रदेशप्रमुखसमक्ष पद तथा गोपनीयताको शपथ प्रहण गरेका छन्।
शपथलगत्तै उनले मन्त्रिपरिषद् विस्तार गरेका छन्। थापाले आज आफ्नै दल एमाले, सत्तासाझेदार (नेकपा) र राप्रपाका गरी ६ जनालाई मन्त्री नियुक्त गरेका हुन्।
एमालेबाट भरत केसी भौतिक पूर्वाधार विकासमन्त्री र ज्ञानबहादुर तामाङ विनाविभागीय मन्त्री नियुक्त भएका छन्। केसी यसअघि नेपाली कांग्रेस नेतृत्वको संयुक्त सरकारमा वन तथा वातावरण मन्त्री थिए।
यसैगरी, नेकपाबाट सरल सहयात्री पौडेल आर्थिक मामिला तथा योजनामन्त्री नियुक्त हुँदा राप्रपाबाट राजु विष्ट खानेपानी, ऊर्जा तथा सिचाईं मन्त्री, गिरबहादुर तामाङ स्वास्थ्य तथा सामाजिक मन्त्री र राजेन्द्र प्रजापति उद्योग, पर्यटन, श्रम तथा यातायातमन्त्री नियुक्त भएका छन्।
बागमतीमा मुख्यमन्त्री तथा मन्त्रिपरिषद्को कार्यालयसहित आठ वटा मन्त्रालय छन्। भागबण्डा मिलाएर थप मन्त्री नियुक्त गरिने जनाइएको छ।
-1787143572.jpg)
