काठमाडौं- नेपालले सन् २०२८ को आईसीसी पुरुष टी–२० विश्वकपका लागि सिधै ग्लोबल छनोट खेल्ने भएको छ। अन्तर्राष्ट्रिय क्रिकेट परिषद् (आईसीसी) ले सार्वजनिक गरेको नयाँ छनोट प्रणालीअनुसार नेपालले एसिया क्षेत्रीय छनोट खेल्नु नपर्ने भएकाे हाे ।
आईसीसीका अनुसार सन् २०२६ को टी–२० विश्वकपमा सहभागी भए पनि स्वतः विश्वकपमा स्थान सुरक्षित गर्न नसकेका टोलीहरूलाई सिधै ग्लोबल छनोटमा सहभागी गराइनेछ। नेपाल पनि यही समूहमा परेकाले क्षेत्रीय छनोटको चरण पार गर्नुपर्ने छैन। नेपालले टी–२० विश्वकप २०२६ मा समूह चरणबाटै यात्रा टुंग्याएको थियो। यद्यपि विश्वकपमा प्रत्यक्ष स्थान बनाउन नसके पनि ग्लोबल छनोटमा सिधै प्रतिस्पर्धा गर्ने अवसर भने सुरक्षित गरेको हो।
ग्लोबल छनोटमा विश्वकप खेलेका टोलीसँगै क्षेत्रीय छनोटबाट आउने आठ टोली पनि सहभागी हुनेछन्। अफ्रिका, एसिया र युरोपबाट दुई–दुई तथा अमेरिका र पूर्वी एसिया–प्रशान्त (ईएपी) क्षेत्रबाट एक–एक टोली छनोट भएर ग्लोबल छनोटमा पुग्नेछन्।
ग्लोबल छनोटपछि प्रत्येक क्षेत्रबाट उत्कृष्ट प्रदर्शन गर्ने एक–एक टोली तथा समग्र प्रदर्शनका आधारमा उत्कृष्ट थप तीन टोली गरी कुल सात टोलीले सन् २०२८ को टी–२० विश्वकपमा स्थान बनाउनेछन्। आईसीसीले यसपटक न्यूनतम प्रदर्शनको मापदण्ड पनि लागू गर्ने जनाएको छ।
यसअघि टी–२० विश्वकप छनोट एसिया–ईएपी, युरोप, अमेरिका र अफ्रिका क्षेत्रीय प्रतियोगितामार्फत हुँदै आएको थियो। तर आईसीसीले पुनः ग्लोबल छनोट प्रणाली लागू गर्ने निर्णय गरेको हो।
यससँगै आईसीसीले टी–२० विश्वकपको प्रतियोगिता संरचनामा पनि परिवर्तन गरेको छ। यो प्रस्ताव आईसीसीको वार्षिक सम्मेलनबाट पारित भइसकेको भए पनि अन्तिम स्वीकृति भने आगामी नोभेम्बरमा हुने बैठकपछि प्रदान गरिने जनाइएको छ।
![सिण्डिकेटधारीविरुद्ध व्यवसायीको आक्रोशः २५ व्यवसायीको तस्बिरमा जुत्ता प्रहार [भिडियो]](https://www.prabhabonline.com/uploads/posts/200X200/jutta-prahar-bairo-1789318338.jpg)