इंग्ल्यान्ड – घरेलु टिम इंग्ल्यान्डविरुद्धको निर्णायक टेस्टमा पाकिस्तानले खराब प्रदर्शन गरेको छ ।
साउथह्याम्पटनको द रोज बलमा टेस्टको तेस्रो दिन आइतबार पहिलो इनिङ्समा २ सय ७३ रन जोड्दा अल आउट भएपछि पाकिस्तान फलो अनमा परेको हो ।
अजहर अलीले अविजित रहँदै १ सय ४१ रनको शतकीय इनिङ्स खेलेपनि इंग्ल्यान्डले पाकिस्तान ३१० रनले पछि पारेको हो । खराब प्रदर्शनबाट गुज्रिएको पाकिस्तानको इनिङ्सलाई अजहर अलीको शतकसँगै सम्मान जनक स्थितिमा पुगेको हो ।
अलीको शतकबाहेक पाकिस्तानका मोहम्मद रिजवानले ५३ रनको अर्धशतकीय इनिङ्स खेले । फावद आलमले २१ तथा यासिर शाहले २० रन बनाए । इंग्ल्यान्डका जेम्स एण्डरसनले ५ विकेट लिए । स्टुवार्ड ब्रोडले २ तथा क्रिस वोक्स र डम बेसले १÷१ विकेट लिए ।
यसअघि टस जितेर पहिले ब्याटिङ गरेको इंग्ल्यान्डले ८ विकेटको क्षतिमा ५ सय ८३ रन जोड्दै इनिङ्स समाप्तिको घोषणा गरेको थियो ।
ब्याट्सम्यान ज्याक क्रोलीले दोहोरो शतक बनाएपछि इंग्ल्यान्डले उच्च स्कोर बनाएको थियो । क्रोलीले २ सय ६७ रनको दोहोरो शतकीय इनिङ्स खेले । टेस्टमा क्रोलीको यो पहिलो दोहोरो शतक हो ।
तीन खेलको सिरिजमा इंग्ल्यान्ड १–० ले अघि रहेको छ । दोस्रो टेस्ट वर्षाले बराबरी भएपछि यो टेष्टलाई निर्णायक मानिएको हो ।
