अब पार्टीभित्र गुट, उपगुटलाई छुट दिइँदैन । नीति, निर्णय र नियमविपरीत जाने, नेतृत्वविरुद्ध जानेलाई कारबाही हुन्छ । आफ्नै खुट्टामा बञ्चरो हान्ने बाटोमा कोही पनि लाग्न हुँदैन ।
पुष्पकमल दाहाल
अध्यक्ष, माओवादी केन्द्र
काठमाडौं- नेकपा माओवादी केन्द्रका अध्यक्ष पुष्पकमल दाहाल र उपमहासचिव जनार्दन शर्माबीच विचार, नेतृत्व शैली र पार्टीको आन्तरिक लोकतान्त्रिक प्रक्रियाबारे मतभेद चुलिँदै गएको छ । दुवैले सार्वजनिक मञ्चबाट एकअर्काविरुद्ध कडा शब्दमा टिप्पणी गर्दै आएका छन् ।
यसअघि बसेको स्थायी समिति बैठकपछि भने दुई नेताबीचको विवाद मत्थर भएको दाबी गरिएको थियो तर पछिल्ला अभिव्यक्तिहरूले विवादले झनै उग्र रुप लिँदै गएको देखाएको हो । शनिबार काठमाडौंमा आयोजित एक कार्यक्रममा उपमहासचिव शर्माले दाहालप्रति लक्षित गर्दै शेषनागले पृथ्वी बोक्ने कुरा दन्ते कथा भइसकेको टिप्पणी गरे । ‘शेषनागले कहीँ पृथ्वी बोकेको पनि छैन । शेषनागले पृथ्वी बोकेको पनि हुँदैन । त्यो त दन्ते कथा हो । शेषनागले पृथ्वी बोकेको छ, त्यसले यसो हल्लाइदियो भने भूकम्प आउँछ भन्ने त दन्त्यकथा हो,’ उनले भने, ‘आज त विज्ञानले अर्कै पुष्टि गरिसक्यो । त्यस कारणले यो पृथ्वी चल्छ, केही ढल्दैन ।’ अध्यक्ष दाहालले गत महाधिवेशनबाट दिएको उपमहासचिव पदलाई उनले हालैका दिनमा अस्वीकारसमेत गरेका छन् । उनले आफू माओवादी नेतामात्रै भएको बताउन थालेका छन् । पद अस्वीकारेका शर्माले अध्यक्ष दाहाल तानाशाही र निरंकुशतातर्फ उन्मुख भएको भन्दै आलोचना गर्ने गरेका छन् ।
शेषनागले कहीँ पृथ्वी बोकेको पनि छैन । शेषनागले पृथ्वी बोकेको पनि हुँदैन । शेषनागले पृथ्वी बोकेको छ, त्यसले यसो हल्लाइदियो भने भूकम्प आउँछ भन्ने त दन्त्यकथा हो ।
जनार्दन शर्मा
नेता, माओवादी केन्द्र
दाहालसमेतलाई संकेत गर्दै पुष्पलाल स्मृति दिवसमा आयोजित कार्यक्रममा त शर्माले मनमोहन अधिकारीबाहेक सबै पूर्वप्रधानमन्त्रीहरू भ्रष्टाचार भएको आरोप लगाए । अध्यक्ष दाहालले पार्टीले गुमाएको जनमतको जिम्मा लिएर आत्मालोचना गर्नुपर्ने माग उनको छ । दाहालको नेतृत्वमा पार्टी अस्पष्ट वैचारिक भूमरिमा फसेको जस्तो आरोप पनि शर्माले लगाउने गरेका छन् । उता अध्यक्ष दाहालले शर्माले सार्वजनिकरूपमा नेतृत्वमाथि प्रश्न उठाएर पार्टीभित्र अनावश्यक विवाद र ध्रुवीकरण सिर्जना गरेको आरोप लगाएका छन् । उनले पार्टी छाड्नसमेत चेतावनी दिने गरेका छन् ।
दाहालले जनार्दनलाई लक्षित गर्दै पार्टीभित्र अनुशासन नमान्ने र बाहिर सार्वजनिकरूपमा नेतृत्वमाथि आक्रमण गर्ने नेताहरूले संगठनलाई कमजोर पार्ने अभिव्यक्ति दिँदै आएका छन् । उनले शर्माको नाम नलिए पनि व्यक्तिगत महŒवाकांक्षाले पार्टीलाई अप्ठ्यारोमा पार्ने बताए । बिहीबार उनले शर्मालाई लक्षित गर्दै पार्टी अनुशासन नमान्नेलाई कारबाही हुने चेतावनीसमेत दिए । ‘अब पार्टीभित्र गुट, उपगुटलाई छुट दिइँदैन । नीति, निर्णय र नियमविपरीत जाने, नेतृत्वविरुद्ध जानेलाई कारबाही हुन्छ,’ दाहालले अखिल नेपाल ट्रेड युनियन गण्डकीले आयोजना गरेको कार्यक्रममा भने, ‘आफ्नै खुट्टामा बञ्चरो हान्ने बाटोमा कोही पनि लाग्न हुँदैन ।’
गएको महाधिवेशनबाट शर्मा महासचिव हुन चाहन्थे । तर, अध्यक्ष दाहालले देव गुरुङलाई बनाएपछि असन्तुष्ट छन् । उनै शर्माकै कारण गत विधान महाधिवेशनबाट माओवादीले नेतृत्वमा पनि प्रत्यक्ष निर्वाचन गर्ने प्रावधान भएको विधानलाई पारित गरेको छ । पार्टी संगठनमा प्रभावशाली शर्मालाई अध्यक्ष दाहालले चुनौतीको रुपमा लिने गरेका छन् । जबकि, युद्धकालभर जनार्दन दाहालका सैन्य मोर्चाका असाध्यै विश्वासपात्र थिए । यतिबेला भने दुई नेता आमनेसामने भइरहेका छन्, जसकारण कतै पार्टी त विभाजन हुँदैन ? कतिपय माओवादी नेता कार्यकर्तामा संशय छ ।
