६५ जना प्रतिवादीमध्ये १४ जना प्रतिवादीको नाम खुलेको छ तर ठेगाना खुलेको छैन । ५१ जनाविरुद्ध ठगी, संगठित अपराध र सम्पत्ति शुद्धीकरणअन्तर्गत कारबाहीको माग गरिएको छ ।
वसन्तकुमार शर्मा
प्रवक्ता, कास्की प्रहरी
काठमाडौं– राष्ट्रिय स्वतन्त्र पार्टी (रास्वपा)का सभापति रवि लामिछानेसहित ५१ जनालाई सहकारी ठगी, संगठित अपराध र सम्पत्ति शुद्धीकरणमा मुद्दा चलाउन सरकारी वकिल कार्यालयलाई कास्की प्रहरीले राय दिएको छ । उनीहरूबाट सहकारी ठगीमा एक अर्ब ५१ करोड ४० लाख ९४ हजार रुपैयाँ बिगो दाबी गर्न पनि प्रहरीको राय छ ।
पोखराको सूर्यदर्शन सहकारी ठगीमा उनीहरूको संलग्नता अनुसन्धानको क्रममा देखिएको प्रहरीको दाबी छ । तर, सहकारी ठगीमा भने ६५ जनाको संलग्नता देखिएको थियो । त्यसमध्ये १४ जनाको नाम खुलेको तर ठाउँ नखुलेको हुनाले मुद्दा चलाउन राय नदिएको कास्की प्रहरी प्रवक्ता वसन्तकुमार शर्माले जानकारी दिए । उनका अनुसार ठेगाना खुलेको बखत अनुसन्धान गरेर प्रहरीले पूरक प्रतिवेदन पेस गर्ने छ ।
उनले प्रभावसँग भने, ‘हामीले सहकारी ठगी, संगठित अपराध र सम्पत्ति शुद्धीकरणमा अनुसन्धान गरेका थियौं । अनुसन्धान गर्ने क्रममा फेला परेका सबुत प्रमाणहरू विश्लेषण गरेका छौं र अनुसन्धान प्रतिवेदनमा सामेल गरेका छौं । ६५ जना प्रतिवादीमध्ये १४ जना प्रतिवादीको नाम खुलेको छ तर ठेगाना खुलेको छैन । ५१ जनाविरुद्ध ठगी, संगठित अपराध र सम्पत्ति शुद्धीकरणअन्तर्गत कारबाहीको माग गरिएको छ ।’
मुद्दा चलाउन राय दिएकामध्ये ३७ जना फरार छन् । १४ जनामात्रै पक्राउ परेका छन् । कास्की प्रहरीले ८६ दिनसम्म अनुसन्धान गरेर वकिल कार्यालयमा प्रतिवेदन बुझाएको हो । प्रतिवेदनको आधारमा वकिल कार्यालयले चार दिनभित्र जिल्ला अदालत कास्कीमा प्रतिवादीहरूविरुद्ध आरोपपत्र दायर गर्नुपर्ने छ । प्रतिवादीमध्येमै पूर्वडिआइजीसमेत रहेका छविलाल जोशी छन् ।
जोशीलाई ६ असोजमा प्रहरीले काठमाडौंको शंखमुल क्षेत्रबाट पक्राउ गरेको थियो । लामिछानेलाई भने २ कात्तिकमा पार्टी केन्द्रीय कार्यालय बनस्थलीबाट पक्राउ गरिएको थियो । उनीहरू ४ असोजमा सहकारीको बचत अपचलनबारे छानबिन गर्न गठित संसदीय छानबिन विशेष समितिले बुझाएको प्रतिवेदनमा सहकारी बचत अपचलनमा जिम्मेवार रहेको किटान गरिएको थियो । उक्त प्रतिवेदन कार्यान्वयन गरेको सरकारले छविपछि रविलाई पक्राउ गराएको हो ।
प्रतिवादीमा नेचर हब्र्सका सञ्चालक रामबहादुर खनाल, गोर्खा मिडिया ग्रुपका अध्यक्ष गितेन्द्रबाबु (जिबी) राईलगायत छन् । रवि, छवि र जिबी पोखराको सूर्यदर्शन, बुटवलको सुप्रिम, काठमाडौंको स्वर्णलक्ष्मी, चितवनको साहारा, वीरगञ्जको सानो पाइला र नेपालगञ्जको समानता सहकारीको रकम गोर्खा मिडियामा लगेर अपचलन गर्ने काममा जिम्मेवार रहेको समिति प्रतिवेदनले औंल्याएको थियो । त्यसपछि उनीहरूमाथि अनुसन्धान अघि बढाइएको थियो ।
त्यही क्रममा पहिले छवि र त्यसपछि क्रमशः छवि र रवि पक्राउ परे । अन्ततः कास्की प्रहरीले बुझाएको प्रतिवेदनका आधारमा वकिल कार्यालयले आगामी शुक्रबारसम्ममा अदालतमा मुद्दा दायर गरिसक्नुपर्ने भएको छ । किनभने कुनै पनि आरोपीलाई ९० दिनभन्दा बढी अवधि हिरासतमा राख्न मिल्दैन । आगामी शनिबार जोशीलाई पक्राउ गरेको ९० दिन हुँदै छ । त्यही भएर शुक्रबारसम्म आरोपपत्र अदालतमा दायर गर्ने कार्यालयको तयारी रहेको वकिल कार्यालयकी प्रवक्ता कमला काफ्लेले बताइन् ।
लामिछानेविरुद्ध कास्की जिल्ला अदालतले २ कात्तिकमा पक्राउ पुर्जी जारी गरेको थियो । लगत्तै पक्राउ गरेर उनलाई पोखरा चलान गरिएको थियो । ४ असोजको दिन बचत अपचलनमा जिम्मेवार ठहरिएको थियो । त्यस आधारमा पक्राउ परेका उनीविरुद्ध ४ कात्तिक पहिलोपटक छ दिन म्याद थप गरिएको थियो । ८ कात्तिकमा दोस्रोपटक सात दिन, २० कात्तिकमा तेस्रोपटक १० दिन, २५ कात्तिक मा चौथोपटक १३ दिन र २५ कात्तिकमा पोखराबाट भैरहवा लगेर बयान लिइएको थियो ।
यसपछि ९ मंसिरमा पाँचांैपटक १५ दिन म्याद थप, १३ मंसिरमा पोखराबाट काठमाडौं ल्याएर बयान, १८ मंसिरमा काठमाडौंबाट चितवन लगेर बयान, २३ मंसिरमा छैटौंपटक चार दिन, २४ मंसिर पोखराबाट पर्सा लगियो । सोही दिन उनको बयान भयो । २६ मंसिरमा पर्सा–काठमाडौं हुँदै पोखरा लगिएको र २७ मंसिरमा सातौंपटक पाँच दिन म्याद गरिएको थियो ।
अन्ततः १ पुसमा अनुसन्धान प्रतिवेदन प्रहरीले वकिल कार्यालयमा बुझाएको शर्माको भनाइ छ । लामिछानेले भने हालसम्म इन्कारी बयान दिएका छन् । सहकारीको बचत अपचलनमा आफ्नो संलग्नता नरहेको दाबी गरेका छन् । तर, यहीबीचमा प्रहरीले सहकारीको ऋण तिर्न काटेको चेक फेला पारेको छ । त्यसलाई प्रहरीले लामिछाने सहकारी ठगीमा संलग्न भएको पुष्टि हुने प्रमाण ठानेको छ । यद्यपि, रविको इन्कारी जारी छ ।
रविसँगै जिबी र छविले गोर्खा मिडिया नेटवर्कमार्फत ग्यालेक्सी फोरके टेलिभिजन स्थापना गरेर देशका विभिन्न सहकारीबाट गैरकानुनी रुपमा गोर्खा मिडियामा पैसा लगेर अपचलन गरेको आरोपमा अनुसन्धान भइरहेको छ ।
प्रहरी हिरासतमा रविको दुई महिना
४ असोज – बचत अपचलनमा संसदीय समितिबाट जिम्मेवार ठहर
२ कात्तिक – कास्कीमा पक्राउ पुर्जी जारी
२ कात्तिक – काठमाडौंमा पक्राउ
३ कात्तिक – कास्कीको पोखरामा लगियो
४ कात्तिक – पहिलोपटक छ दिन म्याद थप
८ कात्तिक – दोस्रोपटक सात दिन म्याद थप
२० कात्तिक – तेस्रोपटक १० दिन म्याद थप
२५ कात्तिक – चौथो पटक १३ दिन म्याद थप
२५ कात्तिक – पोखराबाट भैरहवा लगेर बयान
९ मंसिर – पाँचौ पटक १५ दिन म्याद थप
१३ मंसिर – पोखराबाट काठमाडौं ल्याएर बयान
१८ मंसिर – काठमाडौंबाट चितवन लगेर बयान
२३ मंसिर – छैंटौं पटक चार दिन म्याद थप
२४ मंसिर – पोखराबाट पर्सा लगियो
२५ मंसिर – पर्सामा बयान
२६ मंसिर – पर्सा–काठमाडौं हुँदै पोखरा लगियो
२७ मंसिर – सातौंपटक पाँच दिन म्याद थप
१ पुस – अनुसन्धान प्रतिवेदन सरकारी वकिल कार्यालयमा पेस
-1755862759.jpeg)
