काठमाडौं– सरकारले वैदेशिक रोजगारीमा जानुपूर्व लिइने अभिमुखीकरण तालिमलाई व्यवस्थित र पारदर्शी बनाउने उद्देश्यले राष्ट्रिय परिचयपत्र प्रणालीमा जोड्ने तयारी गरेको छ । यसको लागि वैदेशिक रोजगार विभाग र राष्ट्रिय परिचयपत्र तथा पञ्जीकरण विभागबीच संयुक्त बैठक बसी प्राविधिक तयारीका लागि आवश्यक कार्य सुरु गरिएको छ ।
अभिमुखीकरण तालिमलाई रााष्ट्रिय परिचयपत्र प्रणालीसँग जोड्न आवश्यक कार्य गर्ने गरी दुबै विभागको संयुक्त बैठकले १५ दिनअघि निर्णय गरेको वैदेशिक रोजगार विभागका निर्देशक एवं सूचना अधिकारी गुरुदत्त सुवेदीले बताए । ‘अभिमुखीकरण तालिममा सहभागीको ‘फेसटाइम एटेन्डेन्स’ र ‘आइरिस रिकग्निसन’ प्रणालीलाई राष्ट्रिय परिचयपत्रको प्रणालीसँग जोड्न १०/१५ दिन देखि नै प्राविधिक काम भइरहेको छ,’ उनले भने, ‘तालिममा सहभागी नै नभई प्रमाणपत्र लिने गरेको भन्दै अभिमुखीकरण सम्बन्धी चौतर्फी गुनासो बढेपछि यसलाई व्यवस्थित र परादर्शी बनाउने उदेश्यले राष्ट्रिय परिचयपत्र प्रणालीमा जोड्ने निर्णय गरिएको हो ।’
अभिमुखीकरण तालिममा सहभागी नै नभई प्रमाणपत्र लिने गरेको पाइएको भन्दै विभागले गत असोज २९ गतेबाट आइरिस प्रणाली लागू गर्ने निर्णय गरेको थियो । यसअघि (एक वर्ष) देखि नै उक्त प्रणाली लागू गर्न खोजे पनि पटक–पटक स्थगित हुँदै आएको थियो । यद्यपी प्राविधिक कारण देखाउँदै उक्त प्रणाली हालसम्म पनि कार्यान्वयनमा ल्याइएको छैन । तर आइरिसलाई सीधै राष्ट्रिय परिचयपत्र प्रणालीसँग जोड्ने काम भइरहेकाले छिटै कार्यान्वयनमा जाने सूचना अधिकारी सुवेदीले बताए ।
‘राष्ट्रिय परिचयपत्रसँग जोडिएपछि तालिममा सहभागी हुने व्यक्तिको रेकर्ड स्वतः जानकारीमा आउँछ,’ उनले भने, ‘जसका कारण विदेश जाने व्यक्तिले नै अनिवार्य तालिम लिनुपर्ने अवस्था आउँछ, यसले तालिममा सहभागी नभई प्रमाणपत्र लिने वेथितिको अन्त्य गर्नुका साथै वैदेशिक रोजगारीसम्बन्धी सचेतनामा समेत योगदान पुर्याउँछ ।’
विभागले आइरिस कार्यान्वयनमा ल्याउन नसक्दा हालसम्म पनि बायोमेट्रिक फिंगरप्रिन्ट प्रणालीबाटै अभिमुखीकरण तालिम सञ्चालन भइरहेको छ । प्राविधिक रुपमा केही समस्या सिर्जना भएका कारण यसअघि आइरिसलाई अनिवार्य लागू गराउन नसकिएको सूचना अधिकारी सुवेदीले बताए । उनका अनुसार अब एक महिनाभित्रै राष्ट्रिय परिचयपत्र प्रणालीसँग जोडिएर अनिवार्य रुपमा आइरिस लागू हुनेछ । ‘पहिलो चरणमा अभिमुखीकरण तालिमलाई जोडेर कार्यान्वयनमा लगे पनि क्रमशः स्वास्थ्य परीक्षणलगायत वैदेशिक रोजगारसँग सम्बन्धित अन्य प्रणाली पनि राष्ट्रिय परिचयपत्र प्रणालीमा इन्टरलिंक गर्दै लैजाने विभागको तयारी छ,’ उनले भने ।
