- दैनिकजसो भाडा बढाउँदै हवाई कम्पनी
- वैदेशिक रोजगारीमा जाने कामदार महँगो भाडादरको मारमा
- मलेसिया तथा खाडी मुलुकहरुमा जाने कामदार प्रभावित
- हवाई माफियाले कृत्रिम अभाव खडा गरी चर्को भाडा असुलिरहेको वैदेशिक रोजगारी व्यवसायी संघको भनाइ
काठमाडौं– नेपाल वैदेशिक रोजगार व्यवसायी संघले अन्तर्राष्ट्रिय हवाई उडानको भाडादरमा अस्वाभाविक वृद्धि र कृत्रिम अभाव सिर्जना गरिएको भन्दै यसको नियन्त्रणका लागि श्रम, रोजगार तथा सामाजिक सुरक्षामन्त्री शरतसिंह भण्डारीको ध्यानाकर्षण गराएको छ ।
नेपालबाट वैदेशिक रोजगारीमा जाने कामदारले अत्यन्त महँगो दरमा हवाई टिकट खरिद गर्नु परेको र हवाई कम्पनीहरुले दिनदिनै भाडा वृद्धि गरिरहेको भन्दै संघले बुधबार एक ज्ञापनपत्र बुझाउँदै मन्त्री भण्डारीको ध्यानाकर्षण गराएको हो ।
नेपालबाट मलेसिया र मध्यपूर्वका गन्तव्य मुलुकमा दैनिक करिब १५ सय नेपाली कामदार वैदेशिक रोजगारीमा जाने गरेको तथ्य प्रस्तुत गर्दै उनीहरुकै कारण एयरलाइन्सहरुको व्यापार वृद्धि भएको संघले उल्लेख गरेको छ । संघले बुझाएको ज्ञापनपत्रमा सीमित एयरलाइन्सहरुको मिलेमतोमा कृत्रिम अभाव खडा गरी कालोबजारी गरेकाले अस्वाभाविकरुपमा टिकटको मूल्यवृद्धि गरेर सिण्डिकेट लागू गरिएको उल्लेख छ ।
‘हवाई कम्पनीहरुले समान्यतः ३० देखि ३५ हजार रुपैयाँमा नियमित पाउने टिकटलाई अहिले ७० देखि ८० हजार रुपैयाँ पु¥याई दोब्बर मूल्यको टिकटमा कामदार जान बाध्य भएकोले उक्त कालोबजारीलाई रोकेर सस्तो र सुलभ एवं नियमित टिकटको मूल्यमा जान पाउने व्यवस्था नगरिए कामदारमाथि चर्को आर्थिक भार पर्ने छ, जसका कारण वैदेशिक रोजगारीको अवसरसमेत गुम्ने र यसले विदेशी मुद्रा सञ्चिति एवं राष्ट्रिय अर्थतन्त्रमासमेत नकारात्मक असर पर्ने विषयमा माननीय मन्त्रीज्यूलाई अवगत गराइन्छ,’ संघले बुझाएको ज्ञापनपत्रमा भनिएको छ ।
नेपालजस्तै मलेसिया र खाडी राष्ट्रहरुमा कामदार पठाउने भारत, बंगलादेश, श्रीलंका, पाकिस्तान, इन्डोनेसियलगायत सार्क राष्ट्रहरुबाट पठाउँदा यति धेरै हवाई भाडा नभएको उल्लेख गर्दै संघले भारतको दिल्लीबाट दुबईको २६ हजार ६२३ देखि ३० हजार ४९४ रुपैयाँ र बंगलादेशबाट दुबईको २३ हजार ३२९ देखि २६ हजार २१४ रुपैयाँ हवाई भाडा रहेकोसमेत मन्त्री भण्डारीलाई जानकारी गराएको छ । हवाई माफियाले कृत्रिम अभाव खडा गरी नेपालबाट वैदेशिक रोजगारीमा जाने कामदारलाई चर्को भाडा असुलिरहेको संघका अध्यक्ष राजेन्द्र भण्डारीले बताए ।
साथै, पर्यटक आउने मुख्य समयमा अन्तर्राष्ट्रिय विमानस्थललाई स्तरोन्नतिको बहानामा दैनिक १० घण्टा बन्द गर्नुले पनि चर्को हवाई भाडाको मार खेप्नुपरेको उनको भनाइ छ । स्वदेशी विमानस्थलबाट नेपाली कामदार पठाउन हवाई टिकट अत्यधिक महँगो भएका कारण सहजीकरण गरी सर्वसुलभ र नियमित शुल्कमा टिकट पाउने व्यवस्था मिलाउन पनि भण्डारीले सरकारसँग आग्रह गरे ।
संघले यसअघि नै वैदेशिक रोजगारीका मुख्य गन्तव्य मलेसियालगायत खाडी मुलुकहरुमा उडान भर्ने एयरलाइन्सहरुले एकतर्फीरुपमा हवाई भाडामा अस्वाभाविक वृद्धि गरेकोप्रति विरोध जनाउँदै आएको छ । संघले गत भदौ पहिलो हप्ता पनि एक विज्ञप्ति जारी गर्दै निरन्तर अन्तर्राष्ट्रिय हवाई भाडा बढिरहेकोप्रति विरोध गरेको थियो । छ महिना अगाडिदेखि नै सम्बन्धित निकायहरुलाई ध्यानाकर्षण गराउँदासमेत समस्या समाधान नभई निरन्तर अन्तर्राष्ट्रिय हवाई भाडा बढिरहेकोले श्रममन्त्री भण्डारीलाई समस्या अवगत गराउन ज्ञापनपत्र बुझाइएको संघका महासचिव मेघनाथ भुर्तेलले जानकारी दिए ।
उनका अनुसार महँगो हवाई भाडाका कारण श्रम स्वीकृति लिई भिसा प्राप्त गरेका कामदारलाई ‘एनओसी लेटर’ उपलब्ध गराई न्यूनतम शुल्कमा छिमेकी राष्ट्र भारतको विमानस्थल प्रयोग गरेर पठाउने व्यवस्था मिलाउन मन्त्री भण्डारीसँग आग्रहसमेत गरिएको छ ।
