आइतबार राष्ट्रपति रामचन्द्र पौडेलबाट शपथ लिएसँगै सर्वोच्च अदालतले प्रकाशमान सिंहलाई ३१औं प्रधानन्यायाधीशका रुपमा पाएको छ । सर्वोच्च अदालतको नेतृत्वमा आउनासाथ हरेक प्रधानन्यायाधीशको चुनौतीको विषय हो– न्यायालयमाथिको विश्वासमा कमी हुन नदिनु ।
‘सानालाई ऐन, ठूलालाई चैन’ चर्चित नेपाली उखानको प्रसंग बेलाबेला न्याय सम्पादनका बेला मिलेको आरोप जिल्ला अदालतदेखि सर्वोच्चसम्मलाई लाग्छ । अझ पछिल्लो समय न्यायमा ढिलाइ हुँदा ‘मरेपछि ओखती’ भन्ने उखान पनि चर्चामा आउँछ । सर्वोच्चमा अहिले १० वर्षदेखिका मुद्दा छन् । यस्तो मुद्दा करिब २६ हजारको संख्यामा रहेको बताइन्छ । १० जना प्रधानन्यायाधीश फेरिँदा पनि काभ्रेकी पूर्णिमाया लामाको मुद्दाको किनारा लागेको छैन । पूर्णिमायाको श्रीमान् अर्जुन लामाको हत्या अभियोगमा सर्वोच्चमा दायर मुद्दाको ६३औं पटक पेशी तोकियो । तर, यो मुद्दालाई सर्वोच्चले वारपार गर्न सकेको छैन । यस्ता सयौं मुद्दा छन् जसका कारण अरू मुद्दाको सम्पादनमा ढिलाइ हुने छ ।
कुनै बेला नेपाल बार एसोसिएसनका अध्यक्ष रहेका बेला राउतले अदातलभित्र विकृति भएको भन्दै औंला उठाएका थिए । अहिले राउत आफैं नेतृत्वमा पुगेका छन् । अहिले बारसँग सर्वोच्चको ¥याङठ्याङ नमिल्ने लगभग पक्का देखिन्छ । बारका अध्यक्ष गोपालकृष्ण घिमिरेले राउतलाई साथ नदिने छनक देखाइसकेका छन् ।न्यायाधीश नियुक्तिमा असन्तुष्टि जनाउँदै घिमिरेले विरोध गर्दा सर्वोच्चमा उनीमाथि अवहेलनाको मुद्दासमेत परेको थियो । यद्यपि, घिमिरेविरुद्ध परेको उक्त रिट फिर्ता लिने भएको छ । आफ्नाविरुद्धको उजुरीमा परेका सांसदहरुको प्रश्नमाथि जवाफ दिने क्रममा राउतले फैसलाको पूर्णपाठ पढ्न सुझाउँदै कूटनीतिक जवाफ दिएर सर्वोच्चको नेतृत्वमा पुगिसकेका छन् । राउतविरुद्ध संसदीय सुनुवाइ समितिमा छ वटा उजुरी परेका थिए ।
न्यायाधीश नियुक्ति जहिल्यै विवादित बन्छ । सर्वोच्चमा आवश्यक चारजना न्यायाधीशको नियुक्ति राउतका लागि अर्को काउसोको विषय बन्ने छ । न्यायाधीश नियुक्ति गर्ने न्याय परिषद् ऐनको प्रावधानप्रति नेपाल बारको विरोध छ । बारले वर्तमान न्याय परिषद् ऐन खारेजीको माग गरेको छ । बेञ्च र बारबीच तीक्ततापूर्ण सम्बन्ध रहेकाले त्यसलाई सुधार गर्नुपर्ने अहिलेको अवस्थामा राउतले भरपर्दो भूमिका निभाउनुपर्ने देखिन्छ । अर्को महŒवपूर्ण विषय भनेको न्यायालयलाई बिचौलियामुक्त बनाउनु । चैत १६, २०८२ सम्म सर्वोच्चको नेतृत्वमा रहँदा माथिका चुनौतीमाथि सुधार गर्नसके राउत सफल भएको ठहरिने छ ।
-1787143572.jpg)
