काठमाडौं – संकटपूर्ण अवस्थाको सामना गरिरहेको दल राष्ट्रिय स्वतन्त्र पार्टी (रास्वपा)को ‘क्लोज क्याम्प’ले राष्ट्रिय भेला गर्न सुझाव दिएको छ । एकातिर, पार्टी सभापति रवि लामिछानेमाथि कानुनी चुनौती थपिनेगरी प्रश्नैप्रश्न उठेपछि अप्ठ्यारोमा परेकै बेला राष्ट्रिय भेला गर्नुपर्ने सुझाव आएको हो ।
क्लोज क्याम्प (बन्द कार्यशाला)ले पार्टी केन्द्रीय समितिलाई आगामी भदौ ३ र ४ गते भेला गर्न सुझाएको हो । आगामी २०८२ को वैशाख तेस्रो साता महाधिवेशन गर्न पनि सुझाएको पार्टीका कार्यवाहक प्रवक्ता मनिष झाले बताए ।
बन्द कार्यशालाले केन्द्रीय समितिलाई विभिन्न १५ विषयमा सुझाव दिएको छ । जिल्ला संयोजक, उपसंयोजक र निर्वाचन क्षेत्र समितिको संलग्नतामा जिल्ला भेला गरेर तदर्थ समिति गठन गर्न र विधान संशोधन सुझाव कार्यदलको प्रतिवेदन भदौ मसान्तभित्र तयार गरी राष्ट्रिय भेलामा पेस गर्न सुझाव दिएको छ ।
शासकीय स्वरुपका विषयमा पार्टीभित्र छलफल गरी संविधान संशोधनका बारेमा पार्टीको अवधारणा तयार गर्न, देशका गाउँदेखि सहर र विदेशसम्मका नेपालीसँग भेटघाट अभियानको सुरुआत गर्ने, स्थानीय तहमा छायाँ सरकार गठनको अभ्यास थालनी गर्न पनि बन्द कार्यशालाले सुझाव दिएको छ ।
पार्टीको केन्द्रीय अर्थ व्यवस्थापन समितिलाई विस्तार गरेर देश विदेशमा रहेका सबैलाई जोड्न पार्टी पिलर्स अवधारणा लागू गर्ने, क्यान्डिडेट क्लब र लिडरसिप एकेडेमीको नियमावली र कार्यविधि भदौ मसान्तभित्र तयार गर्न पनि सुझाव दिएको कार्यवाहक प्रवक्ता झाले विज्ञप्तिमार्फत जानकारी दिए ।
रास्वपामा सांसददेखि नेताहरू अनेक काण्डमा मुछिएका छन् । उपसभामुख इन्दिरा राना मगर हालैका दिनमा मानव तस्करीको आरोपमा मुछिएकी छन् । कांग्रेस र एमालेका सांसदहरूले उनलाई संसद्मै मानव तस्करीको रुपमा चित्रण गरेका छन् ।
पार्टी महामन्त्री डा. मुकुल ढकाल पदीय आचरणअनुसारको व्यवहार प्रदर्शन नगरेको भन्दै निलम्बित छन् । निलम्बित भएपछि उनले पार्टीका आन्तरिक विषयहरू सार्वजनिक गरिरहेका छन् । पार्टीका उपसभापति डिपी अर्याल, स्वर्णिम वाग्ले, महासचिव कविन्द्र बुर्लाकोटीलगायतका नेताहरूविरुद्ध विभिन्न आरोप छन् ।
सभापति लामिछाने बहुचर्चित सहकारी ठगी प्रकरणमा मुछिएका छन् । उनलाई एमाले सांसद सूर्यबहादुर थापा संयोजक रहेको संसदीय छानबिन विशेष समितिले गोरखा मिडिया नेटवर्कको तत्कालीन प्रबन्ध निर्देशकको हैसियतमा जवाफ मागेको छ । यसरी चौतर्फीरुपमा असहज परिस्थिति छँदा रास्वपा क्लोज क्याम्पमा बसेको हो ।
