- अध्यक्ष राजेन्द्र लिङ्देन र महामन्त्री डा. धवलशमशेर जबरा नेतृत्वको दुई समूहबीच संघर्ष
- अध्यक्षलाई बलियो बनाउनुपर्ने लिङ्देनपक्षीय नेताहरुको भनाइमा जबरा समूहको प्रतिरोध
- अध्यक्ष होइन, पार्टी बलियो बनाउनुपर्नेमा जबरा समूहको जोड
- आफू कमजोरै भएर पार्टीलाई बलियो बनाउन लिङ्देन तयार
काठमाडौं– राष्ट्रिय प्रजातन्त्र पार्टी (राप्रपा)मा दुई लाइन संघर्ष झनै चर्किएको छ । पार्टी महाधिवेशन गर्ने अवधि नजिकिँदै जाँदा अध्यक्ष राजेन्द्र लिङ्देन र महामन्त्री डा. धवलशमशेर जबराले नेतृत्व गरेको भिन्नभिन्न खेमाबीच संघर्ष बढ्दै गएको हो ।
पार्टीमा लिङ्देनले एक्लौटी गरेको भन्दै जबरा समूहले विरोध गर्दै आएको छ । लिङ्देन भने जबरा समूहलाई नसुनेझैं गरेर अघि बढिरहेका छन् ।बिहीबार र शुक्रबार काठमाडौंमा भएको पार्टीका जिल्ला अध्यक्षहरूको दुईदिने भेलामा लिङ्देन र जबरा समूहको टकराव छताछुल्ल भएको थियो । भेलामा जबरा समूहकै उपाध्यक्ष विक्रम पाण्डेले अध्यक्ष लिङ्देन र उनलाई देवŒवकरण गरेको भन्दै आक्रोश पोखेका थिए ।
पार्टीमा नेतृत्वलाई बलियो बनाउनुपर्ने केही साथीहरूको धारणा सुनियो । के नेतृत्वलाई बलियो बनाउने पौष्टिक आहारा खुवाएर ? कि कसरी ।
विक्रम पाण्डे
उपाध्यक्ष, राप्रपा
‘पार्टीमा नेतृत्वलाई बलियो बनाउनुपर्ने केही साथीहरूको धारणा सुनियो । के नेतृत्वलाई बलियो बनाउने पौष्टिक आहारा खुवाएर ? कि कसरी,’ पाण्डेको भनाइ उदृत गर्दै भेलामा सहभागी एक नेताले भने, ‘खाली नेतृत्व बलियो बनाउनुपर्छ भन्ने सुन्छु । बनाउनुपर्ने बलियो त पार्टी होइन र ?’लिङ्देनपक्षीय नेताहरूले बारम्बार लिङ्देनको प्रशंसा गर्दै नेतृत्वमा उनलाई थप बलियो बनाउनुपर्ने मत प्रकट गरेका थिए । उपाध्यक्ष बुद्धिमान तामाङसहितका नेताहरूले एक सिट रहेको राप्रपा लिङ्देनको नेतृत्वमा चुनावमा जाँदा १४ सिटसहित बलियो शक्तिका रुपमा देखापरेको बताएका थिए ।
‘नेतृत्वलाई सहयोग गरौं । आलोचनामात्रै नगरौं । बरु उहाँ (लिङ्देन)लाई थप बलियो बनाएर अघि बढौं,’ तामाङको भनाइ थियो । तामाङको यही सवालमाथि जवाफ फर्काउँदै अर्का उपाध्यक्ष पाण्डेले पौष्टिक आहारा खुवाएर नेतृत्वलाई बलियो पार्नुपर्ने हो ? भन्दै सोधेका हुन् । लिङ्देनले पार्टीलाई संस्थागतरुपमा सञ्चालन गर्न नसकेको, राजसंस्था र हिन्दूराष्ट्रको एजेन्डालाई सशक्त ढंगले अघि बढाउन नसकेको, युवा वर्गलाई पार्टीमा स्थान दिन कञ्जुस गरेको र केही नेता कार्यकर्तालाई काखी च्यापेर र बहुसंख्यक नेता कार्यकर्तालाई टाढा पारेको भन्दै आलोचना परेको हो । त्यसरी नै लिङ्देनअघि बढे पार्टीलाई २०८४ मा हुने चुनावमा घाटा हुने उनको भनाइ थियो ।
गत वर्षको चैत तेस्रो साता लिङ्देनको नेतृत्वमा काठमाडौंमा राप्रपाले प्रदर्शन गरेको थियो । त्यसपछि राप्रपा थला प¥यो । भन्न चाहिँ राप्रपाले व्यवस्था परिवर्तनका लागि सत्तापलट हुनेगरी आन्दोलन गर्ने चेतावनी दिएको थियो । तर, आन्दोलनलाई राप्रपाले धान्न सकेन । यसपछि समीक्षा बैठकमा लिङ्देनलाई सरकार विरोधी प्रदर्शनलाई सशक्त बनाउन नसकेको भन्दै कतिपय नेताले विरोध जनाएका थिए । पार्टीका नेता ठाकुरमोहन श्रेष्ठलाई पार्टी कार्यालयमै कुटपिट गर्नेलाई पनि लिङ्देनले उन्मुक्ति दिएको भनिएको थियो । सत्तामा जान बारम्बार प्रयास गर्ने लिङ्देन कदमको पनि विरोध जबरा समूहले गर्दै आएको छ ।
यहाँ सुनियो कि मलाई बलियो बनाउनुपर्छ भन्ने तर त्यस्तो होइन । म कमजोरै बसौंला तर पार्टीलाई बलियो बनाऔं ।
राजेन्द्र लिङ्देन
अध्यक्ष, राप्रपा
बैठकमा अध्यक्ष लिङ्देनले पाण्डेप्रति काउन्टर जवाफ फर्काएका थिए । उनले आफूलाई भन्दा पनि पार्टीलाई बलियो बनाउन पार्टी पंक्ति एकताबद्ध र प्रतिबद्ध भएर अघि बढ्नुपर्नेमा जोड दिएका थिए । ‘यहाँ सुनियो कि मलाई बलियो बनाउनुपर्छ भन्ने तर त्यस्तो होइन । म कमजोरै बसौंला तर पार्टीलाई बलियो बनाऔं,’ लिङ्देनको भनाइ उद्धृत गर्दै अर्का नेताले बताए ।
जबरा समूहले प्रदेश खारेजीको एजेन्डाधारी दल राप्रपाले प्रदेश संसद्को नेतृत्व गर्न नहुने भन्दै पछिल्लोपटक कोशी प्रदेशमा सभामुख लिएको विषयलाई गम्भीर असहमति प्रकट गरेको थियो । अध्यक्ष लिङ्देनकै नेतृत्वमा पार्टी सरकारमा जानुलाई पनि यो समूहले अनपयुक्त भनेको थियो । तर, लिङ्देनलाई अझैसम्म उपयुक्त र अपरिहार्य भन्दै आएको छ । सरकारमा जानुको औचित्य पुष्टि हुने बताउँदै आएका छन् ।
रवीन्द्र मिश्र राप्रपामा सुकुम्बासी !
पूर्वपत्रकारसमेत रहेका रवीन्द्र मिश्रको राप्रपा प्रवेश तीन वर्ष हुनै लागेको छ । उनी पार्टीको वरिष्ठ उपाध्यक्ष छन् । पार्टी कार्यालयमा रहेको अभिलेखमा उनको पदीय जिम्मेवारी वरिष्ठ उपाध्यक्षकै हो । तर, सरकारको निकाय निर्वाचन आयोगले मिश्रलाई वरिष्ठ उपाध्यक्षको रुपमा चिन्दैन । कारण, उनको नाम निर्वाचन आयोगमा राप्रपाले बुझाएको दलीय विवरण अद्यावधिक छैन ।
राप्रपा जिल्ला अध्यक्षहरूको भेलामा जबरा समूहले नै मिश्र र उनको नेतृत्वमा विवेकशील साझा पार्टीबाट आएका नेता कार्यकर्तालाई किन राप्रपामा सुकुम्बासी बनाइयो भन्दै प्रश्न गरेको थियो । ‘उहाँ आउनुभएको तीन वर्ष भइसक्यो । पद पनि वरिष्ठ उपाध्यक्ष हो तर उहाँलाई निर्वाचन आयोगले चिन्दैन,’ बैठकमा सहभागी एक नेताले भने, ‘यसरी उहाँहरूलाई सुकुम्बासी कहिलेसम्म बनाइराख्ने ? जवाफ चाहियो ।’ मिश्र भने त्यसबेला मुसुक्क हाँसेका थिए ।
अधिवेशन तयारीमा लाग्न निर्देश
भेलाले आगामी निर्वाचन र पार्टीको महाधिवेशन एउटै समयमा पर्ने भएकाले त्यहीअनुसार तयारी गर्न पार्टीका तहगत समितिहरूलाई निर्देश गरेको छ । २०८२ वैशाख मसान्तसम्म हरेक स्थानीय तहको अधिवेशन सक्ने लक्ष्य लिएको छ ।
सक्रिय सदस्यता वितरण र पार्टी प्रवेशलाई अभियानकै रुपमा राप्रपाले लाने भएको पार्टी प्रवक्ता मोहन श्रेष्ठले जानकारी दिए । उनका अनुसार कांग्रेस–एमालेले सरकार राम्रो नियतले गठन नगरेको राप्रपाको निष्कर्ष छ ।
‘विभिन्न काण्डहरूलाई ढाकछोप गर्न नयाँ समीकरण बनेको छ । यसले जनताको अपेक्षाकृत परिणाम दिन सक्दैन । ठूला भनिएका पार्टीहरू दलदलमा फसेको र नयाँ भनिएका पार्र्टीहरूले जनतामा आशा पैदा गर्न नसकेको अवस्थामा राप्रपाको लागि उर्बर अवसरको रुपमा लिनुपर्छ भन्ने निष्कर्ष छ,’ प्रवक्ता श्रेष्ठले बताए ।
-1755862759.jpeg)
