काठमाडौं– वैदेशिक रोजगार विभागले इजरायलका दीर्घकालीन स्याहार केन्द्रमा सहायक कामदार (केयर गिभर) पठाउन आवेदन आह्वान गरेसँगै ठगी गर्ने गिरोह सक्रिय भएकोप्रति सचेत गराएको छ । इजरायलमा कामदार पठाइदिने भनी विभिन्न निकाय तथा व्यक्तिहरुले अनधिकृतरुपमा रकम असुली गरेको भन्ने जानकारी प्राप्त भएको जनाउँदै विभागले यसतर्फ सजग हुन आग्रह गरेको छ ।
विभागका महानिर्देशक डण्डुराज घिमिरेले एक विज्ञप्ति जारी गर्दै इजरायलमा कामदार पठाउने प्रक्रिया जिटुजी (सरकार–सरकारबीच) अन्तर्गत पर्ने भएकाले छनोट प्रक्रिया निष्पक्ष र पारदर्शी हुने उल्लेख गरे । अनधिकृतरुपमा रकम संकलन भइरहेको जानकारी प्राप्त भएकाले गम्भीर ध्यानाकर्षण भएको उनले बताएका छन् । इजरायल पठाउने कामदारको छनोट प्रक्रियाबारे कतिपय व्यक्ति तथा समूहबाट सञ्चार माध्यममार्फत भ्रामक सूचना सार्वजनिक गरिरहेको पाइएको भन्दै विभागले त्यस्ता गलत र भ्रामक कार्यमा संलग्न नहुन चेतावनी दिएको छ । साथै, विभागको आधिकारिक सूचनालाई मात्र आधार मान्नसमेत आग्रह गरेको छ ।
रोजगारीको प्रलोभन देखाएर विभिन्न व्यक्ति तथा समूहबाट देखाइएको प्रलोभनमा नपर्न विभागले सबैमा अनुरोध गरेको छ । इजरायलमा केयरगिभरका लागि ५०० मुख्य र ३०० वैकल्पिक गरी ८०० जनाको माग आएको गत असार ११ गते विभागद्वारा प्रकाशित विज्ञापनमा उल्लेख छ । विभागले इच्छुकहरुबाट आवेदन माग गरेको थियो ।प्राप्त सूचनाको आधारमा यस किसिमका ठगी र गलत प्रचारका सम्बन्धमा सूक्ष्मरुपमा अनुसन्धान गरिरहेकोले विभागले जनाएको छ । साथै, यस्ता कार्यहरु भए गरेको जानकारी भएमा जोसुकैले पनि कल सेन्टरलगायत विभागमा सूचना प्रवाह गरी सहयोग पुयाउन पनि विभागले आग्रह गरेको छ । यसअघि असार १३ गते इजरायलमा जान इच्छुक कामदारको आह्वान गरेलगत्तै विभागले गैरकानुनीरुपमा प्रलोभनमा पारी रकम ठगी गर्ने गिरोह सक्रिय भएको भन्दै सचेतता अपनाउन आग्रह गरेको थियो ।
विभागले केयर गिभरका लागि माग गरेको आवेदन यही साउन ११ गतेसम्म दिन सकिने उल्लेख गरेको छ । इजरायलका दीर्घकालीन स्याहार केन्द्रमा बच्चा, युवा तथा ६५ वर्ष ननाघेका गम्भीर अपांगता भएका व्यक्तिको हेरचाह तथा स्याहार गर्न नेपालबाट केयर गिभर माग भएको विभागले जनाएको छ । रोजगारीका लागि आकर्षक गन्तव्य मानिएको इजरायलमा केयर गिभरमा छनोट हुनेले मासिक पाँच हजार ८८० सेकेल इजरायली मुद्रा अर्थात् दुई लाख १० हजार रुपैयाँभन्दा बढी पारिश्रमिक पाउने छन् । छनोटमा परेका कामदारको करार अवधि सुरुमा एक वर्ष र बढीमा पाँच वर्ष थप हुने विभागले जनाएको छ । यसअघि पनि नेपालबाट केयर गिभरमा काम गर्न झण्डै १२ सय नेपाली इजरायल गइसकेको विभागको तथ्यांकले देखाएको छ ।
