काठमाडौं - उपसभामुख इन्दिरा रानाले अमेरिकी दूतावासलाई लेखेको पत्र १ वर्षदेखि आफूसँगै राखेर अहिले सार्वजनिक गरिएको राष्ट्रिय स्वतन्त्र पार्टीकी सांसद सुमना श्रेष्ठले बताएकी छन् । उपसभामुखले मानव तस्करी गरेको भनेर चरित्र हत्या गर्न खोजेको भन्दै श्रेष्ठले आपत्ति जनाएकी थिइन् ।
प्रतिनिधिसभाको आइतबारको बैठकमा सांसद श्रेष्ठले संवैधानिक परिषद्मा सत्तापक्ष अल्पमतमा परेपछि उपसभामुख रानाले राजदूतावासलाई लेखेको पत्र सार्वजनिक गरिएको र लान्छना लगाइएको बताएकी हुन् । एक जना सांसदले संसद् र सडकमा एक व्यक्तिलाई भिसा देउ भनेर आन्दोलन गरेको देखेको भन्दै सांसद श्रेष्ठले लेटरप्याडको प्रयोगको विधि बनाउनुपर्ने बताइन् ।
उपसभामुखले लेखेको पत्रको विषयमा मिडिया ट्रायल भएको पनि सांसद श्रेष्ठको भनाइ थियो । 'उपसभामुख इन्दिरा रानाको नामबाट मिडिया ट्रायल भइरहेको छ, यसमा आपत्ति जनाउन चाहन्छु,' उनले भनिन्, 'आचरण हेर्ने हो भने सबै जनाको लेटरप्याडबाट के के निस्क्या छ हेरौं र साच्चै पद्धति बनाउँ । यो वास्तवमै आचरणविरुद्धको कार्य हो ? तपाईंहरूलाई मन लाग्यो मिडिया ट्रायल गर्यो ।'
उपसभामुखमाथि मानव तस्करी जस्तो गम्भीर आरोप संसद्मा लगाएको भन्दै श्रेष्ठले आपत्ति जनाइन् । कांग्रेस सांसद रामहरि खतिवडाले उपसभामुखले मानव तस्करी गरेको बताएका थिए । त्यसको प्रतिवाद गर्दै सांसद श्रेष्ठले भनिन्, 'भुटानी शरणार्थी कसले गरेको हो भनेर घोषणा गर्नुस् आँट छ ? एउटा महिला कठिन समयमा यहाँ आउनुभएको छ उहाँलाई हेप्न नखोज्नुहोला । सच्चै विधि पद्धति बनाउन चाहनुहुन्छ ? एकवर्षदेखि पत्र हातमा बोकेर बस्नुभएको रहेछ कुन बेला ठोकौं भनेर ।'
संवैधानिक परिषद्मा सहयोग चाहिए माग्न तर उपसभामुखमाथि यस्तो आरोप नलगाउन सांसद श्रेष्ठको भनाइ थियो । 'यो साँच्चिकै छानबिन गर्ने हो भने गरोस् पार्टी पनि तयार छ तर प्रोपर तरिकाले गरोस् । मिडिया ट्रायल गरेर भाष्य बनाउने, पद्धति नबनाउने र मान्छेको चरित्र हत्या गर्ने त्यो पनि किन भन्दा संवैधानिक परिषद्मा एमालेको दुई, माओवादीको दुई, रास्वपाको एक र प्रधानन्यायाधीश एक, यो अल्पमतमा पर्यो भनेर हो ? माग्नुस् न हो, माग्नुस् दिउँला तर कसैको चरित्र हत्या गरेर मानव तस्कर भन्ने लाञ्छना गर्ने ?,' उनले भनिन् ।
आफ्नो भएभरको जायजेथा अनाथाश्रममा लगाउने महिलाको चरित्र हत्या गर्न नपाइने श्रेष्ठको भनाइ थियो । विधि पद्धति बसाउन हो भने तयार रहेको तर चरित्र हत्या स्वीकार्य नभएको उनले बताइन् ।
