काठमाडौं– नेपालगञ्जमा यही जेठ १७ गते वर्षकै सबैभन्दा धेरै ४४.२ डिग्री सेल्सियस तापक्रम भयो । त्यसपछि धनगढीमा ४४.१ डिग्री मापन भएको तापक्रम त्यसको दुई दिनपछि शनिबार देशभरकै तापक्रम घटेको छ ।
ठाउँठाउँमा वर्षा भएकाले अधिकतम तापक्रममा गिरावट आएको जल तथा मौसम विज्ञान विभागले जनाएको छ । विभागले शनिबार साँझ ६ बजे अद्यावधिक गरेको तापक्रमको विवरणअनुसार ‘रेकर्ड ब्रेक’ गरेको नेपालगञ्जको तापक्रम शनिबार ४१.४ डिग्रीमा झरेको छ । यस्तै धनगढीमा ४०.७ डिग्री कायम भएको छ ।
यसअघि पोखरामा ३४ र काठमाडौंमा ३४.४ डिग्री तापक्रम मापन भएकामा शनिबार झरेर पोखरामा अधिकतम तापक्रम ३१.५ र काठमाडौंमा ३२ डिग्री कायम भएको छ । जेठ १७ गते बिहीबार विराटनगरमा ४१ डिग्री रहेकोमा शनिबार त्यहाँ ३४ डिग्रीमा झरेको तथा दाङको घोराहीमा ४०.२ डिग्री रहेकामा शनिबार ३५.२ डिग्रीमा झरेको छ ।
जल तथा मौसम विज्ञान विभाग, मौसम पूर्वानुमान महाशाखाले सार्वजनिक गरेको देशभरको तापक्रम मापनको विवरणअनुसार शनिबार दीपायलमा ३९.४, वीरेन्द्रनगरमा ३८.१, डडेलधुरामा ३१.४, जुम्लामा २८.९, भैरहवामा ३७.२, सिमरामा ३६.६, ओखलढुंगामा २८, ताप्लेजुङमा २६.८ र धनकुटामा ३०.५ डिग्री अधिकतम तापक्रम मापन भएको छ ।
यस्तै जोमसोममा २२.५, धरानमा ३३.६, लुम्लेमा २५.५, जनकपुरमा ३५.८ र दोलखाको जिरीमा २४.४ डिग्री तापक्रम मापन भएको महाशाखाले जानकारी दिएको छ ।शनिबार नेपालमा स्थानीय वायु, पश्चिमी वायुको आंशिक प्रभावसँगै भारतको पश्चिम उत्तरप्रदेशदेखि पश्चिम बंगलादेशसम्म फैलिएको न्यून चापीय क्षेत्रको पनि आंशिक प्रभाव परेको थियो ।
शनिबार साँझ कोशी, बागमती, गण्डकी र सुदूरपश्चिम प्रदेशको पहाडी भू–भागमा आंशिकदेखि साधारणतया बदली रही बाँकी भू–भागमा मौसम मुख्यतया सफा रहेको विभागले उल्लेख गरेको थियो । रासस
