काठमाडौं – मलेसिया सरकारले आप्रवासी कामदार भर्नामा लगाइएको रोकलाई आगामी दिनमा पनि निरन्तर दिने निर्णय गरेको छ । मलेसियाका गृहमन्त्री सैफुद्दीन नासुशन इस्माइलले रोजगारदातालाई नयाँ कामदार भर्नाका लागि कोटामा लगाइएको बन्देज अझै निरन्तर रहने निर्णय भएको बताएका हुन् ।
गृहमन्त्री सैफुद्दिनले पुत्राजयमा पत्रकार सम्मेलन गरेर मलेसियामा विदेशी कामदारको संख्या अर्थ मन्त्रालयले प्रक्षेपण गरेको एक करोड ७१ लाख श्रमशक्तिको १५ प्रतिशतभन्दा बढी हुन नहुने उल्लेख गर्दै हाललाई नयाँ कोटा नदिने बताएको त्यहाँको सञ्चारमाध्यम ‘द एज मलेसिया’ले जनाएको छ । यस निर्णयसँगै मलेसिया सरकारले अझै केही समय आप्रवासी कामदार नलिने भएको छ । तर यसको निरन्तरता कहिलेसम्म रहन्छ भन्ने कुरा गृहमन्त्री इस्माइलले खुलाएनन् ।
रोजगारदातालाई आप्रवासी कामदार भर्ना गर्न दिइएको कोटा पूरा हुन देखिएपछि थप कामदार नलिने नीति अघि सारेको हुनसक्ने उक्त सञ्चारमाध्यमले उल्लेख गरेको छ । मलेसियाले २०२३ मार्चदेखि नै आप्रवासी कामदार भर्नामा रोक लगाएको छ । त्यहाँको मन्त्रालयले तोकेको अधिकतम सीमा डिसेम्बर ३१ सम्ममा पुग्ने अपेक्षा गरिएको छ । गृहमन्त्री इस्माइलले आप्रवासी कामदारका लागि कुनै नयाँ कोटा नभएको उल्लेख गरेका छन् ।
नयाँ विदेशी कामदार भर्ना गर्न रोक लगाएका कारण कामदारको अभाव हुँदै गएको भन्दै त्यहाँको निजी क्षेत्रले तत्कालै खुलाउनुपर्ने माग गरेको छ । निजी क्षेत्रले कामदार अभावका कारण ठूलो नोक्सानी हुने बताएको सञ्चारमाध्यले उल्लेख गरेका छन् । मलेसियाले आप्रवासी कामदार भर्नामा निरन्तर रोक लगाउने निर्णय गरेसँगै नेपालीहरुले पाउने रोजगारीको अवसर गुम्ने देखिएको छ । मलेसिया सरकारको निर्णयले रोजगारीका लागि जान तयारी गरिरहेका नेपालीहरुलाई प्रत्यक्ष असर गर्ने नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले बताए ।
‘त्यहाँका रोजगारदाताले सरकारको नीति नटेरेको, तोकिएको कोटाभन्दा बढी आप्रवासी कामदार भित्र्याएको र देशको प्रतिष्ठामै आँच पु¥याउने काम गरेको भन्दै उनीहरुलाई रिफर्म गर्न नयाँ भर्ना प्रक्रियामा रोक लगाएको हो भन्ने अनौपचारिक जानकारी पाएका छौं,’ उनले भने, ‘डिसेम्बर २०२४ सम्मलाई कोटा पुगिसकेको भन्ने छ, अहिलेको अवस्थालाई हेर्दा तत्कालै खुल्छ भन्न गाह्रो छ, रोजगारीको अवसर गुम्ने सम्भावना बढी नै छ ।’
मलेसिया नेपाली कामदारहरुको प्रमुख गन्तव्यमध्येको एक हो । गत आर्थिक वर्ष पहिले गन्तव्य बनेको थियो । चालु आवको १० महिनामा पनि एक लाखभन्दा बढी नेपाली मलेसिया गएको वैदेशिक रोजगार विभागको तथ्यांकले देखाएको छ । यसरी रोजगारीको गन्तव्य बनिरहेको मुलुकमा कामदार जान नपाउँदा मुलुकमा भित्रिने रेमिट्यान्समासमेत असर पर्ने व्यवसायीहरु बताउँछन् ।
