काठमाडौं – श्रम, रोजगार तथा सामाजिक सुरक्षामन्त्री डोलप्रसाद अर्यालले रोमानिया जाने नेपाली नागरिकलाई नेपालबाटै भिसा उपलब्ध गराउने व्यवस्था मिलाइदिन आग्रह गरेका छन् । मन्त्री अर्यालले मंगलबार नेपालका लागि रोमानियाका राजदूत डेनिएला मारियाना सेजोनोभ टेनेसँग मन्त्रालयमा भएको भेटवार्तामा उक्त आग्रह गरेका हुन् ।
भेटमा रोमानिया र नेपालबीच श्रमलगायत आपसी हितका विषयमा छलफल भएको बताइएको छ । छलफलका क्रममा मन्त्री अर्यालले रोमानिया र नेपाल सरकारबीच श्रमसम्बन्धी समझदारीसमेत भइसकेको र भिसाका लागि भारत जानुपर्दा नेपालीहरुलाई आर्थिक व्ययभार बढ्न जाने हुँदा नेपालबाट नै रोमानियाको भिसा प्रदान गर्ने व्यवस्था मिलाइदिन आग्रह गरेको उनको सचिवालयले जनाएको छ ।
त्यस्तै, श्रमसचिव घनश्याम उपाध्यायले नेपाली सवारी चालक अनुमतिपत्रलाई रोमानिया सरकारलेसमेत मान्यता दिन आग्रह गरे । साथै रोमानियामा माग हुने रोजगारका क्षेत्रहरु अनुकूल हुनेगरी नेपाली श्रमिकको सीप विकासका लागि सहकार्य गर्न पनि आग्रह गरे ।राजदूत सेजोनोभले रोमानिया रोजगारदाताले नेपाली श्रमिकलाई रुचाएको र रोमानिया सरकारले पनि सहज र सरल प्रक्रियाबाट नेपाली श्रमिक भित्र्याउन चाहेको बताइन् । साथै, रोमानियामा नर्सिङ, निर्माण, हस्पिटालिटीलगायतका क्षेत्रमा नेपालीहरुको अत्यधिक माग रहेको कुरासमेत उनले बताइन् ।
राजदूत सेजोनोभका अनुसार रोमानियाले गत जनवरीदेखि हालसम्म नेपाली युवाका लागि सात हजार ८०० भिसा जारी गरेको छ । गत वर्ष ११ हजार ५०० नेपाली श्रमिक रोमानिया पुगेको उनले बताइन् । आगामी दिनमा यो संख्या झनै बढ्ने उनले दाबी गरिन् । नेपाल र रोमानिया सरकारबीच सन् १९६८ को अप्रिल २० मा कूटनीतिक सम्बन्ध स्थापित भए पनि वैदेशिक रोजगारीको सम्बन्धमा सन् २०२३ को अक्टोबर ६ मा मात्रै श्रमसम्बन्धी समझदारी भएको हो । रोमानियामा हाल करिब २० हजारभन्दा बढी नेपाली श्रमिक रहेको वैदेशिक रोजगार विभागको तथ्याकले देखाएको छ ।
मंगलबार नै मन्त्री अर्याल र साइप्रसका हाइ कमिश्नर एवागोरस व्रियोनाइड्सबीच भेटवार्ता भएको छ । उक्त भेटवार्तामा मन्त्री अर्यालले साइप्रस जाने नेपाली श्रमिकको सीप विकासको कार्यमा सहकार्य गर्न आग्रह गरेको बताइएको छ । उनले साइप्रस सरकारले माग गरेअनुसारको सीप भएका श्रमिक पठाउनका लागि सीप तालिम सञ्चालनमा सहयोग गर्न आग्रह गरे । साइप्रस जाने सबै खालका श्रमिकलाई सीप सिकाउन नेपाल सरकार आतुर रहेको श्रममन्त्री अर्यालले बताए ।
साइप्रसका हाइ कमिश्नर व्रियोनाइड्सले साइप्रसले आफ्नो विकास कोषमार्फत नेपाली श्रमिकको सीप विकास तालिममा सहयोग गर्न सक्ने बताए । उनले नेपाल सरकारको सहभागितामा नै नेपाली श्रमिक साइप्रस पठाउन सके राम्रो हुने उल्लेख गरेको बताइएको छ । साइप्रसमा हाल १० हजारभन्दा बढी नेपाली श्रमिक रहेको विभिन्न अध्ययनले देखाएको छ ।
-1745656903.jpeg)