काठमाडौं– क्यानडा सरकारले विदेशी विद्यार्थीको चाप बढेसँगै रोजगारीको क्षेत्र साँघुरिन थालेपछि आगामी सेप्टेम्बरदेखि श्रम स्वीकृति अर्थात् ‘वर्क परमिट’ नदिने बताइएको छ । क्यानडाले अध्ययनका लागि आएका विदेशी विद्यार्थीले समयमै रोजगारी नपाउने र बेरोजगार हुने क्रम बढ्न थालेपछि स्नातक वा सो भन्दा तल्लो तहमा पढ्ने विद्यार्थीलाई आगामी सेप्टेम्बरदेखि वर्क परमिट नदिने नीति लिएको त्यहाँस्थित नेपाली दूतावासले जनाएको छ ।
दूतावासले केही दिनअघि एक विज्ञप्ति जारी गर्दै क्यानडा पढ्न जाने विद्यार्थीले सजिलै रोजगारी पाइहाल्छन् भन्ने भ्रम नराख्न र आवश्यक पूर्वतयारी गरेरमात्रै क्यानडा आउन विद्यार्थी तथा अभिभावकलाई सुझावसमेत दिएको छ । दूतावासले अध्ययनका लागि क्यानडा जाने नेपाली विद्यार्थीको सचेतनाका लागि जारी गरेको १० बुँदे विज्ञप्तिमा क्यानडा सरकारले अन्तर्राष्ट्रिय विद्यार्थीको संख्या दुई वर्षका लागि ३५ प्रतिशतले घटाउने नीति लिएको उल्लेख छ ।
यसका साथै निजी–सार्वजनिक साझेदारीमा सञ्चालन भइरहेका कलेजमा भर्ना भएका स्नातक र सो भन्दा तल्लो तहमा अध्ययन गर्ने विद्यार्थीलाई आगामी सेप्टेम्बरबाट श्रम स्वीकृति÷वर्क पर्मिट जारी नगर्ने नीति लिएको दूतावासले जनाएको छ ।क्यानडा सरकारद्वारा अन्तर्राष्ट्रिय विद्यार्थीका समस्या र देशको शैक्षिक पूर्वाधार एवं आवास सुविधामा परेको चापलाई ध्यान दिँदै यसै वर्षको जनवरीमा अन्तर्राष्ट्रिय विद्यार्थीसम्बन्धी नयाँ नीति ल्याएको पनि दूतावासले बताएको छ ।
तसर्थ अभिभावकले आफ्ना छोराछोरीलाई अध्ययनका लागि पठाउँदा शैक्षिक शुल्क र खाने/बस्ने खर्चको व्यवस्था गरेर मात्रै क्यानडा पठाउन आग्रह गरिएको छ ।दूतावासले क्यानडा पढ्न आउने विद्यार्थीले आउनासाथ रोजगारी पाइहाल्छन् भन्ने भ्रममा रहँदा कलिलो उमेरका छोराछोरीमा पर्ने अति आवश्यक खर्चका समस्या र मनोवैज्ञानिक तनावका बारेमा हेक्का राख्ने र त्यस्ता समस्या आउनै नदिन सचेतता अपनाउनुपर्ने बताएको छ ।
यतिमात्र नभई क्यानडा पुगेका विद्यार्थीहरुलाई कार्यस्थलमा हुने श्रम शोषण, दुव्र्यवहार वा ठगीमा परे नजिकको प्रहरी कार्यालयमा सम्पर्क गरी कानुनी उपचार खोज्न पनि सुझाइएको छ । साथै पछिल्लो समय क्यानडा जाने नेपाली विद्यार्थीको संख्या बढेसँगै विभिन्न समस्या पनि उजागर हुँदै गएको बताइएको छ । क्यानडामा अध्ययनका लागि जाने तयारीमा रहेका विद्यार्थीले यी नीतिलाई विशेष ध्यान दिन आग्रह गरिएको छ ।
त्यसैगरी अन्य कुनै समस्या आइपरे ओटावास्थित नेृपाली दूतावास, टोरन्टोस्थित नेपाली अवैतनिक महावाणिज्यदूत, गैरअवासीय नेपाली संघ र नेपाली डायस्पोरा समुदायका विभिन्न संघसंस्थाहरुसँग सहयोग लिन सकिने दूतवासले जनाएको छ । क्यानडामा हाल अध्ययनपश्चात् निश्चित अवधि (दुई वर्ष)का लागि काम गर्न श्रम स्वीकृति र अन्य अवसरहरु पनि पाइने हुँदा उच्च शिक्षाका लागि क्यानडा नेपाली विद्यार्थीको आकर्षक गन्तव्य बनेको छ । गएको दुई वर्षदेखि क्यानडाले अन्तर्राष्ट्रिय विद्यार्थीलाई दिइने भिसामा खुकुलो गरेपछि ३० हजार बढी नेपाली विद्यार्थी अध्ययनका लागि क्यानडा पुगेको बताइन्छ ।
