काठमाडौं– श्रम, रोजगार तथा सामाजिक सुरक्षामन्त्री डोलप्रसाद अर्यालले आगामी १५ वर्षभित्र वैदेशिक रोजगारीमा जानुपर्ने बाध्यकारी अवस्थाको अन्त्य गरिने बताएका छन् । आइतबार मन्त्रालयले ‘बृहत् रोजगार मेला’ अयोजना गर्नेसम्बन्धी जानकारी दिन सरोकारवालासँग गरेको छलफल कार्यक्रममा बोल्दै मन्त्री अर्यालले सो कुरा बताएका हुन् ।
उक्त छलफलमा मन्त्री अर्यालले लामो समयदेखि नेपाली जनशक्ति विदेशिनुपर्ने बाध्यकारी अवस्थाको अन्त्य गर्न आगामी डेढ दशकभित्र स्वदेशमै रोजगारी सिर्जना गर्नसक्ने वातावरण बनाउन अहिलेदेखि नै लाग्नुपर्नेमा जोड दिए । ‘हामीले स्वदेशमै रोजगारीको क्षेत्र बिस्तार गर्न नसकेका कारण वैदेशिक रोजगारी बाध्यता बनेको छ,’ उनले भने, ‘अहिलेदेखि नै रोजगारीको क्षेत्रमा काम गर्न पाउने हो भने आगामी १५ वर्षमा बाध्यताले वैदेशिक रोजगारीमा जाने अवस्थाको अन्त्य हुने छ ।’
श्रम मन्त्रालयले रोजगारदाता, अवसरको खोजीमा रहेका युवा र प्रशिक्षण केन्द्रहरुबीच समन्वय गर्ने उद्देश्यका साथ बृहत् रोजगार मेला आयोजना गर्ने तयारी गरेको मन्त्री अर्यालको सचिवालयले जनाएको छ । साथै, रोजगार मेला आयोजनाका विषयमा सरोकारवालाहरुको प्रतिक्रिया तथा सुझाव लिएको बताइएको छ । मन्त्री अर्यालले मेलामा मुख्यगरी श्रमिकको खोजीमा रहेका रोजगारदाता, अवसरको खोजीमा रहेका युवा र विभिन्न सीपयुक्त तालिम प्रदान गरिरहेका प्रशिक्षण केन्द्रको सहभागिता रहने जानकारी दिएको सचिवालयले उल्लेख गरेको छ ।
मेलामा रोजगारदाताले आफूलाई चाहिने श्रमिकमा हुनुपर्ने सीपको विषयमा जानकारी दिने छन् भने अवसरको खोजीमा रहेका युवाले रोजगारीका लागि आवश्यक पर्ने सीपको बारेमा जानकारी लिन सघाउ पु¥याउने मन्त्री अर्यालले विश्वास लिएका छन् । ‘मेलामा सहभागी तालिम केन्द्रले रोजगारीको अवसर खोजिरहेका युवालाई लक्षित गरी रोजगारदाताको आवश्यकताअनुसारको तालिम सञ्चालनका लागि रणनीति बनाउन सक्ने छन्,’ उनले भने ।
कार्यक्रममा श्रमसचिव घनश्याम उपाध्यायले आन्तरिक रोजगारीलाई प्रवद्र्धन गर्ने उद्देश्यले बृहत् रोजगार मेलाको आयोजना गर्न लागिएको बताए । उनका अनुसार मेलालाई सफल बनाउन सम्बन्धित सबै निकायसँग सुझावसमेत लिइने छ । यसैगरी मन्त्रालयका सहसचिव एवं प्रवक्ता गोविन्दप्रसाद रिजालले आन्तरिक रोजगारीको प्रवद्र्धन गरी वैदेशिक रोजगारीको परनिर्भरतालाई कम गर्नका लागि बृहत् रोजगार मेलाको परिकल्पना गरिएको बताए ।
यद्यपि, मेला कहिले सञ्चालन हुने भन्ने टुंगो लागिनसकेको मन्त्रालयले जनाएको छ । सरोकारवालाहरुसँग हुने दोस्रो चरणको छलफल र सुझावका आधारमा मेलाको मिति तय गरिने सचिवालयले उल्लेख गरेको छ ।
छलफल कार्यक्रममा नगरपालिका संघका अध्यक्ष भीमप्रसाद ढुंगाना, होटल व्यवसायी संघका अध्यक्ष विनायक शाह, उद्योग वाणिज्य महासंघ उपाध्यक्ष ज्योत्सना श्रेष्ठ, नेपाल ट्रेड युनियनका उपाध्यक्ष तेजेन्द्र कार्की, रोजगारविज्ञ रामेश्वर नेपाललगायतका व्यक्तिले आ–आफ्नो सुझाव राखेका थिए । आइएलओका प्रतिनिधि सौरभ जोशीले कार्यपत्र प्रस्तुत गरेका थिए ।
