काठमाडौं– वैदेशिक रोजगारीका लागि विभिन्न युरोपेली मुलुक, रसिया र दुबई पठाइदिने भन्दै रकम संकलन गरी ठगी गर्ने क्रम बढ्दो छ । यही प्रकरणमा तीन जना पक्राउ परेका छन् । भोजपुर टम्केमैयुङ गाउँपालिका–३ घर भई हाल ललितपुर ताल्छीखेल बस्ने संघर्ष राई, मुगु खत्याड गाउँपालिका–८ घर भई काठमाडौं कोटेश्वर बस्ने नमराज रावत र भक्तपुर सूर्यविनायक नगरपालिका घर भएका पवन केसी प्रहरीको फन्दामा परेका हुन् ।
राईले आकर्षक तलबमा युरोपका विभिन्न मुलुकमा पठाइदिने भन्दै कमल अभिषेकसहित १३ जना वेरोजगार युवालाई ठगी गरेको बताइएको छ । उनले पीडितहरुसँग युरोपको प्रतिष्ठित कम्पनीहरुमा काम लगाइदिने विश्वास दिलाई पटक–पटक गरी ७४ लाख ९५ हजार रुपैयाँ लिएर ठगी गरेको प्रहरी अनुसन्धानबाट खुलेको छ । फरार अवस्थामा रहेका राईलाई खोजतलासको क्रममा काठमाडौं बालाजुबाट पक्राउ गरिएको हो ।
यस्तै रावतले रसिया पठाइदिने भन्दै तीन लाख रुपैयाँ ठगी गरेको बताइएको छ । उनले प्रेमबहादुर चौधरीलाई रसियामा आकर्षक तलबसहित प्रतिष्ठित कम्पनीमा काम लगाइदिने प्रलोभन देखाई ठगी गरेको प्रहरीले जनाएको छ । पीडितसँग पैसा लिएर सम्पर्कविहीन अवस्थामा रहेका उनलाई खोजतलासको क्रममा बानेश्वरबाट पक्राउ गरिएको बताइएको छ ।
यसैगरी पवन केसीले दुबई पठाइदिने बहानामा आचल तिवारीसँग चार लाख ९० हजार रुपैयाँ ठगी गरेको बताइएको छ । उनले पीडितलाई दुबईमा आकर्षक आम्दानी हुने गरी एक प्रतिष्ठित कम्पनीमा काम लगाइदिने भन्दै ठगी गरेको प्रहरीले उल्लेख गरेको छ ।
पीडितबाट रकम लिएर सम्पर्कविहीन भएका उनीहरुलाई वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरु तीनै जनालाई थप अनुसन्धान तथा कारबाहीका लागि विभागमा बुझाइएको काठमाडौं उपत्यका अपराध अनुसन्धान कार्यालयका प्रहरी उपरीक्षक रविन्द्र रेग्मीले जानकारी दिए ।
